Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo hatete, dadus jerál iha Timor laran númeru aumenta kada loron.

“Kazu detetatu foun iha dia 13 Abril 2021: 12 (7 iha Dili, 5 iha Munisipiu sira seluk). Kazu rekuperadu iha dia 13 de Abril 2021: 0 (zero). Husi totál kazu detetadu mane 4, feto 8, kazu sira ne’e 100% asintomátiku. Totál kazu ativu ohin dia 13 de Abril 2021 hamutuk 544”, informa Rui liuhusi komunikadu imprensa iha loron tersa (13/04).

Tuir evolusaun surtu Covid-19 iha Munisípiu Dili, iha loron 13 fulan-abril deteta kazu foun 7. Nune’e, kazu detetadu ka pozitivu iha Munisípiu Dili husi loron 7 fulan-marsu 2021 (loron ne’ebé hahú deteta kazu iha cluster BTN II, Terra Santa, Madohi), to’o loron 13 fulan-abril 2021, hamutuk hotu 844.

Baze ba informasaun ne’ebé disponível, ekipa konjunta saúde halo fali revizaun ba foku propagasaun/cluster iha Munisípiu Dili.

Suku sai nu’udar área geográfika ne’ebé uza hanesan baze atu haree ligasaun entre kazu, no ligasaun ho expozisaun ba fonte infesaun. Maibé Munisípiu Dili, hamutuk hotu, sei nafatin iha cluster 23.

Nune’e mós, evolusaun surtu covid-19 iha Munisípiu Likisá deteta tan kazu foun 4. Kazu hirak ne’e halo viajen husi Dili.

Haree ba evolusaun iha Munisípiu Aileu deteta ona kazu pozitivu 1. Kazu pozitivu ne’e halo viajen husi Dili. No iha Munisípiu sira seluk ho RAEOA, la deteta kazu foun.

Aliende ne’e, husi loron segunda to’o tersa (12-13/04) Laboratóriu Nasionál Saúde (LNS) halo 452 testes
PCR, ho detalle hanesan Vijilánsia sentinela 85, Rastreiu ba kontaktu (Contact tracing) 2. No Rastreiu Aleatoriu (Random Screening) 10. Viajen sai husi serka sanitária Munisípiu Dili 207, Viajen internasionál 148, maibé Follow up iha quarentena laiha.

Totál pedidu autorizasaun esepsionál atu sai husi serka sanitária iha Munisípiu Dili, iha loron 13 fulan-abril, hamutuk hotu 215. Sekretáriu SIJK responde hotu keda, maibé pedidu 10 la prienxe kritériu tuir Resolusaun Governu. (*)