Matebian nia laen no oan na’in-2 hamrik ketak-ketam ho matan-been ne’ebé turu, bainhira haree matebian nia kaisaun hatun neneik ba rai kuak hodi sai fatin ikus nia.
Bainhira akompaña prosesu funeral ba matebia nian oan na’in-rua obrigau labele hamrik hamutuk ho nia aman hodi asisté inan ne’ebé háhoris sira, tanba oan ida iha izolamentu ho matebian nia laen kaben.
Oan mane ida hamutuk ho nia aman iha sala izolamentu no nia oan mane ida hela hamutuk ho família.
Haree ba situasaun iha semitériu matebian nia-oan mane kaer metin fotografia husi matebian hodi hamrik akompaña husi dook.
Info Foto : Oan Ki'ak ka'er hela nia mama nia foto durante misa Requem iha semiteiru Covid 19 Metinaro, Tersa (6/4)
Oan mane ho laen ne’ebé hamrik iha ambulánsia laran hodi hateke de’it ho matanben durante prosesu funeral.
Matebian mai husi Munisípiu Baukau, Postu Admistrativu Laga, Suku Salari, mate ho idade 44, husik hela Lain no oan na’in-rua
Mate isin matebian antes lori ba halot iha semitériu Metinaro, iha oras tuku 12:30 ambulánsia Ministériu Solidariedade Sosial no Inkluzaun (MSSI) ne'ebé lori kaisaun to’o iha fatin ospital Lahane akonpanã kedan ekipa SIJK no Ministériu Saúde (MS) tama ba sala ospital halot Matebian.
Antes transporta sai husi Lahane ba Metinaro iha oras tuku 12:50 otl kontinua kedan misa requem ne'ebé prezide husi Pe.Angelo Salsinha antes halot ba fatin ikus ne'ebé prepara ona iha oras tuku 13:54 otl.
Durante prosesu viajen ba semitériu Metinaro hetan seguransa husi Polisia Nasional Timor-Leste (PNTL) liuhusi Unidade Tránzitu, tuir kedan ambulánsia ne'ebé tula matebian, no ambulánsia MS tula família prinsipal (Laen-Oan) akonpanã kedan ekipa SIJK no Jornalista no ikus husi karreta polisia tránzitu.
Hafoin remata prosesu tomak, maun husi matebian ne'ebé reprejenta Família, Roberto Jose Barbosa hatete, sira sente triste maibé maromak nia planu no sempre kolabora ho Governu.
"Ami lakon ami-nia família, sente triste maibé ida-ne'e maromak nia planu”, dehan Roberto.
Roberto rasik promete bainhira pandemia Covid-19 remata sei lori hikas Matebian ba nia rai hodi halo prosesu tuir lisan.
Iha simteiru durante prosesu funeral, partisipa husi funsionáriu SIJK, MS, ekipa MSSI no hetan seguransa hotu PNTL Postu admistrativu Matinaro no Falintil-FDTL inklui família balun ne'ebé ho inisiativa rasik ba dereitamente partisipa hamutuk na’in-13.(*)