Maibé, dadus jerál kazu pozitivu ne’ebé Centro Integrado Gestão de Crises, Sala Situação (CIGC-SS) fó sai iha loron 28 fulan-marsu tinan 2021, númeru kazu foun hamutuk 11 no rekoperadu hamutuk 13.
“Ohin, loron 28 fulan Marsu 2021, hodi CIGC-SS nia naran, hakarak hato’o ba públiku tomak, dadus jerál kazu foun ohin 11, kazu rekuperadu 13. Totál kazu ativu hamutuk 322. Husi kazu foun na’in-11, iha mane na’in-7 no feto na’in-4, hothotu asintomátiku.”, deklara Koordenadór Forsa-Tarefa Prevensaun no Mitigasaun Surtu Covid-19 iha Timor-Leste, Rui Maria de Aráujo, liuhusi Zoom Conference, domingu (28/03).
Haree ba evolusaun surtu Covid-19 iha Munisípiu Dili ba loron 28 Dylan-marsu iha kazu foun 11. Nune’e, kazu detetadu ka pozitivu iha Munisípiu Dili husi loron 7 to’o 28 fulan-marsu tinan 2021, hamutuk hotu 329.
Baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili, hetan revizaun. Tanba kompleta semana tolu, hahú deteta kazu pozitivu iha BTN II, Aldeia Terrasanta, Suku Madohi, nomós kazu iha Aldeia 20 de Setembru, Suku Bebonuk.
“To’o ohin, iha cluster 54 iha Munisípiu Dili, maibé ho baze da evolusaun propagasaun virus iha cluster sira ne’e, durante semana rua ikus, sura husi dia 14 de Marsu de 2021, ekipa konjunta saúde deside atu deklara katak iha cluster 11 (20%), mak la ativu ona iha transmisaun virus, tanba iha semana 2 nia laran ona la iha kazu foun, no sira ne’ebé kontaktu-besik ho kazu pozitivu iha cluster hirak ne’e, sira nia rezultadu teste PCR negativu dala rua”, esplika Rui.
Ho nune’e, iha Munisípiu Dili, sei iha cluster 43 mak sei nafatin hatudu atividade hada’et- tutan virus SARS-CoV-2 husi ema ida ba ema seluk.
Husi loron 27 to’o 28 fulano-marsu Laboratóriu Nasional Saúde (LNS) halo 497 testes PCR, inklui ona iha laran 196 ne’ebé mai husi pedidu autorizasaun esepsionál atu sai husi serka sanitária iha Munisípiu Dili.
Total pedidu autorizasaun esepsionál atu sai husi & tama mai serka sanitária iha Munisípiu Dili, iha loron 27 fulan-marsu, hamutuk hotu 110, maske Sekretariadu CIGC responde hotu kedan, maibé 33 pedidu la prienxe kritéria tuir Resolusaun Governu. (*)
