“Husi kazu ativu ne’ebé iha izolamentu, iha ida ne’ebé tama kategoria moderadu. Kazu ida ne’e sofre insufisiensia renal kronika, no halo hemodiálize durante tinan rua ona”, deklara Rui liuhusi Zoom Conference, domingu (21/03).
Kazu ida ne’e detetadu pozitivu loron rua liu-ba, no Ninia oráriu hemodiálize loron kinta ho segunda. Maibé iha loron kinta (18/03) la konsegue halo hemodiálize tanba unidade hemodiálize Hospital Nacional Guido Valadares (HNGV) taka hodi halo dezinfesaun.
(Horikalan iha sala izolamentu Tasitolu, nia iha problema oksijenasaun, no ekipa médika izolamentu nian deside transfere ba Vera Cruz nu’udar fatin ne’ebé preparadu atu halo izolamentu ba kazu moderadu sira. To’o loriak ne’e ninia kondisaun estável”, informa nia.
Pasiénte ne’e kontinua halo tratamentu ba hipertensaun no loron segunda (22/03) nia oráriu atu halo hemodiálize iha HNGV, ne’ebé prepara ona fatin espesiál ba halo hemodiálize ba ema sira ne’ebé mós pozitivu SARS-CoV-2.
Tuir dadus ne’ebé fó sai husi Centru Integrado Gestão de Crise- Sala Situação (CIGC) kazu founloron domingu (21/03) hamutuk 55. Iha kazu rekuperadu 3, no kazu ativu 206.
Husi kazu na’in-55, iha mane na’in 23, feto na’in 32, ema ho idade tinan 0-14 hamutuk 13. Maibé ema ho idade entre tinan 16-67 hamutuk 42. Nune’e mós ema sintomátiku 9 no asintomátiku 46.
Husi loron sábadu (20/03) to’o loron domingu (21/03) ekipa saúde halo ona teste polymerase chain reaction (PCR) hamutuk hotu 425. (*)