Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, teste PCR ne'ebé médiku sira halo populasaun hamutuk rihun 16 liu ne'e, hahú kedan iha fulan-janeiru to'o horisehik (17/03/2021) hodi halo prevensaun ba moras surtu covid-19.

"Testes PCR ne’ebé hala’o hahú Janeiro 2021 mai to’o horisehik, 17 Marsu 2021, hamutuk hotu 16,959. Iha fulan-janeiru hala'o 2,567 testes PCR, fulan-fevereiru 6,390, husi 1 de Marsu to’o 17 de Marsu hala’o ona 8002 testes no husi horisehik mai ohin halo 233 testes”, informa Rui Araújo ba jornalista sira liuhusi Zoom conferência, kinta (18/03).

Maibé, progresu kazu pozitivu iha munisípiu Dili nian ba ohin loron (18/03), ekipa médiku sira deteta tan kazu pozitivu hamutuk 13, kompostu husi mane 9 no feto 4.

Entre pasiénte sira ne'e, ho idade ne'ebé la hanesan, labarik ho tinan 11 to'o 12 iha na'in ema 2, sira ne'ebé ho idade 18 to'o 50 iha na'in-11, maibé iha 3 mak hatudu sintomátiku, no na'in 10 seluk laiha sintomas.

Maske nune'e, iha kazu 1 mak rekoperadu, no kazu ativu ne'ebé oras ne'e iha sala izolamentu hamutuk 119.

Kazu sira ne'e mosu husi fatin ne'ebé diferente, tanba kazu pozitivu 2, hetan kontajiu husi profisionál saúde husi cluster Aldeia 05 ho cluster Aldeia São Miguel, Suku Comoro, iha HNGV husi unidade hemodiálize nian.

Kazu pozitivu 6, deteta iha Aldeia Avansa, Suku Bairro Pite, Postu Administrativu Dom Aleixu, tanba halo kontaktu-besik ho kazu pozitivu iha cluster ne’ebé fó sai ona iha loron 16 fulan-marsu.

"Kazu pozitivu 1, iha Aldeia Metin 3, Suku Bebonuk, Postu Administrativu Dom Aleixu. Kazu ne’e ba aprezenta-an iha HNGV hakarak tes tanba deskonfia iha kontatu-besik ho kazu iha Bebonuk. Kazu pozitivu 2 iha Aldeia Lirio, Suku Motael, Postu Administrativu Vera. Kazu ne’e ba aprezenta-an iha HNGV hakarak teste tanba deskonfia iha besik ho kazu ida iha Bebonuk", dehan Rui.

Iha kazu pozitivu 1, deteta iha Aldeia Maucocomate, Suku Bekora, Postu Administrativu Cristo Rei, tanba halo kontatu besik iha servisu fatin ho kazu ida ne'ebé halo cluster iha Aldeia Mate Restu, Suku Vila-Verde.

"Ho nune’e, kazu detetadu ka pozitivu iha Munisípiu Dili husi dia 7 de Marsu to’o ohin, hamutuk hotu 95", nia hakotu. (*)