Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, (CIGC-SS) Rui Maria de Araújo hatete, dadaun ne'e kazu hamutuk 104, tanba kazu foun 5 iha mane 2 no feto 3 husi idade 11 ema ida idade entre tinan 32-42 na'in-4 husi pasiénte sira ne'e iha na'in-2 sintomátiku no sira na'i-3 seluk asintomátiku ka la hatudu sintomas.
"Husi 1 de Janeiro 2021 mai to’o agora, iha pursentu sanulu-resin-ida (11%) husi kazu detetadu mak hatudu sintomas, maibé sintoma ne’ebé lijeiru no seidauk iha ema ida mak presiza oksizéniu ka suporte respiratóriu seluk”, dehan Rui liuhusi Zoom conferência, tersa (16/03).
Kazu pozitivu 1 husi Aldeia Terra Santa, Suku Madohi, Postu Administrativu Dom Aleixo, kontaktu-besik iha uma-laran husi cluster BTN II ne’ebé deteta iha loron 7 fulan-marsu, maske teste primeiru negativu, hafoin halo tiha kuarentena, pozitivu iha segundu teste iha loron 15 fulan ne’e.
Iha mós kazu pozitivu 1 husi Aldeia 05, Suku Fatuhada, Postu Administrativu Dom Aleixo, kontaktu-besik ho kazu konfirmadu husi Cluster SEFOPE. Kazu ne’e profisionál saúde ida iha HNGV, unidade hemodiálize, hahú iha sintomas lijeirus iha loron 11 fulan-marsu, hafoin iha loron 15 fulan ne’e halo test, no hatudu pozitivu.
Nune’e mós kazu pozitivu 2 husi Aldeia 20 de Setembro, Suku Bebonuk, Postu Administrativu Dom Aleixo, iha kontaktu-besik ho kazu 2 pozitivu iha cluster hanesan. Husi mós pozitivu na’in-rua ne’e mak hamosu cluster ida iha Baukau, Uailili, ne’ebé anunsía loron rua liu-bá.
Maibé, kazu pozitivu 1 husi Aldeia Avansa, Suku Bairro Pite, Postu Administrativu Dom Aleixo, kontaktu besik husi kazu pozitivu iha cluster Aldeia 4 de Setembru, ne’ebé hetan da’et husi nia la’en ne’ebé servisu iha MTC. Ho nune’e, kazu detetadu ka pozitivu iha Munisípiu Dili husi loron 7 to’o 16 fulan-marsu, hamutuk 77.
"Kazu detetadu 77 iha Dili ne’e, fahe ba cluster 23, namkari iha instituisaun 3, eventu 1 no Suku 7 iha Postu Administrativu D. Aleixo, nomós Postu Administrativu Vera Cruz”, informa Rui.
Iha diresaun Hospital Nacional Guido Valadares (HNGV) hola ona medidas hadi tau iha kuarentena kolega servisu sira iha unidade hemodiálize, halo dezinfesaun, no buka-tuir kontaktu besik husi kazu ne’ebé pozitivu.
Iha kontaktu-besik husi kazu sira ne’ebé deteta pozitivu iha unidade padiatria no meternidade iha loron hirak liu-bá, sira hotu 3 nia rezultadu negativu.
Maibé HNVG sei mós identifika funsionáriu sira hotu ne’ebé servisu iha ospital no hela iha área cluster kazu pozitivu iha Dili laran, atu halo teste hotu.
" Evolusaun surtu covid-19 iha Munisípiu Baukau, iha Munisípiu Vikeke, ohin laiha kazu foun, ekipa konjunta saúde hala’o nafatin atividade buka-tuir kontaktu-besik husi kazu pozitivu 2 ne’ebé anúnsia horiseik no hanesan mós ho Baukau, ekipa laboratóriu nasionál apoia estabelese kapasidade atu halo teste laboratóriu iha Vikeke, no wainhira volume teste ultrapasa sira-nia kapasidade análize iha Vikeke mak sei lori mai laboratóriu Nasionál iha Dili”, hatete.(*)
