Print this page

Kazu Pozitivu Rua iha Vikeke, Pasiénte Covid-19 Sa’e Ba 99

Tempotimor (Dili) - Kazu komfirmadu bá moras Covid-19 na'in-rua deteta ona iha Munisípiu Vikeke no totál pasiénte iha Timor-Leste dadaun sa'e ona ba na'in-99, ne’ebé baixa hela iha sala izolamentu sira.

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, atualiza, kazu foun na'in-7, iha mane na'in-5, feto na'in-2, no sira hotu asintomátiku, ka la hatudu sintomas.

"Kazu foun ohin 7, kazu rekuperadu 5, kazu ativu 99. Kazu hirak ne'e na'in-5 husi Munisípiu Dili, no 2 husi Munisípiu Vikeke”, dehan nia liuhusi Zoom conference, segunda (15/03).

Husi kazu pozitivu 1 iha kuarentena Carla Mansion, ida husi Aldeia Hura, Suku Motael, Postu Administrativu Vera Cruz. Pozitivu ne’e kontaktu besik ho kazu konfirmadu ida husi Cluster Aldeia 4 Setembru, ne’ebé mós hetan transmisaun husi nia la’en husi Cluster MTC.

Nune’e mós Kazu pozitivu 1 husi Aldeia Terra Santa, Suku Madohi, Postu Administrativu DonbAleixo, husi rastreiu aleatóriu. No Kazu pozitivu 1 husi Aldeia Fomento III, Suku Komoro, Postu Administrativu Dom Aleixo, kontaktu besik ho kazu konfirmadu ida husi Cluster Aldeia Fomento III.

Kazu pozitivu 1 husi Aldeia 5 de Outubro, Suku Bairro Pite, Postu Administrativu Dom Aleixo, deteta husi amostra vijilánsia sentinela iha HNGV.

Laboratóriu Nasionál Saúde simu 158 amostras iha loron 14 fulan-marsu husi Munisipiu Vikeke. Hafoin halo análize deteta kazu pozitivu 2.

Ba kazu rua ne’e ida husi Aldeia Umane Iku, Ossu de Cima, Postu Administrativu Ossú, ida seluk husi Aldeia Lari, Suku Afaloikai, Postu Administrativu Uatu-Lari.

Na’in-rua ne’e hotu husi DIli, ida iha loron 12 fulan-marsu, hetan autorizasaun SIJK atu ba hakoi mate, no ida seluk hala’o viajen ba Vikeke iha loron 8 fulan-marsu.

Maibé, ekipa konjunta saúde hala’o ona atividade buka-tuir kontaktu-besik husi kazu pozitivu na'in-2 ne’e.

Haree husi loron 1 fulan-janeiru to’o 14 fulan-marsu tinan 2021, totál kazu detetadu pozitivu iha 143, pursentru haat-nulu-resin-lima (54%) feto, idade média varia entre tinan 22-44, no 38 % diagnostikadu iha kuarentena, no 62% diagnostikadu iha komunidade, ka la’ós iha kuarentena nia laran.

Husi kazu hirak ne’ebé diagnostikadu iha komunidade nia le’et, 67% rezidente iha Dili, 24% iha Covalima, 8% iha Baukau, 1% iha Vikeke.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items