Koordenadór Forsa-Tarefa ba Prevensoun no Mitigasaun Surtu Covid-19 iha Timor-Leste, Rui Maria de Araujo hatete, kazu pozitivu Covid-19 foun ne’ebé rejista iha loron 11 fulan-marsu tinan 2021 hamutuk 14.
“Husi horiseik no ohin (11/03/2021) iha Dili, husi amostra ne’ebé rekolla iha atividade buka-tuir kontaktu besik, iha tan 12 mak pozitivu”, dehan Rui ba jornalista sira iha Sala Situasaun-SS-SIJK, kinta(11/03).
Husi númeru 12 ne’ebé rejista iha Dili Pozitivu 1 kontaktu-besik husi kazu Bebonuk, Pozitivu 8 kontaktu-besik husi kazu sira SEFOPE, Pozitivu 2 kontaktu-besik ho kazu Ministériu Finansas no Ministériu Transportes e Comunicação, Pozitivu 1 iha aldeia 4 de Setembru, Tasitolu, Dili.
Kazu pozitivu iha Dili, hamutuk hotu 36, fahe ba foku, agrupamentu, cluster hanesan BTN II-Terra Santa, Suku Madohi kazu 6 husi Aldeia Gólgota, Madohi kazu 3, Aldeia Lurumata iha ida, Suku Madohi kazu 2 husi Aldeia 4 Setembru, Komoro kazu 1 husi Aldeia Fomento I, Suku Komoro kazu 3 husi aldeia 05, Suku Fatuhada kazu 3, Bebonuk kazu 2, Delta kazu 1, Ministériu Finansas kazu 3, SEFOPE kazu 9, Ministériu Transportes e Comunicação: kazu 2, Hospital Nacional Guido Valadares kazu 1.
“Ohin iha Postu Administrativu Fatumea, deteta hikas pozitivu nain rua, ho CT entre 39 ho 42 signifika iha ona faze rekuperasaun- husi kontaktu- besik na’in-rua ne’ebé halo ho sira-nia segundu teste nune’e, kazu iha Fatumea sa’e ba 15”, esplika nia.
Tanba ne’e, husu ba populasaun atu nafatin kalma lalika pániku, maibé halo tuir regra konfinamentu domisiliáriu jerál, ba populasaun rezidente iha Munisípiu Dili, hodi fó tempu ba ekipa konjunta saúde atu buka tuir kontaktu-besik sira hotu. (*)
