Relasiona ho SWAB ne'e, Ministru Asuntu Parlamentár no Komunikasaun Sosiál (MAPKOMS) Francisco Martins Jerónimo fó ona informasaun serteza ba iha Prezidente Parlamentu Nasionál (PPN), Deputadu Aniceto Longuinhos Guteres Lopes aviza ba deputadu no funsionáriu sira iha Parlamentu Nasionál kona-ba atu hetan SWAB husi ekipa MS.

Tanba, tuir planu teste SWAB ba parlamentu nasionál ne'e sei hala'o iha tuku 16.00, lokraik.

"Ohin mai hasoru malu ho prezidente PN ne'e, atu ko'alia ho prezidente no komfirma de'it Parlamentu Nasionál sei hetan SWAB, husi ekipa Ministériu Saúde," dehan nia ba www.tempotimor.com iha Parlamentu Nasionál, tersa (09/3).

Ho teste SWAB ne'ebé sei oferese ba Parlamentu Nasionál, ida ne'e nudar dalan ida bele hatene loloos parlamentu nasionál hetan da'et ba covid-19 ka lae.

"ida-ne'e depende de'it rezultadu SWAB, keta halo ba da'et to'o ona mai iha-ne'e, ita seidauk hatene loloos, maibé halo SWAB ba mak ita bele hatene loloos katak pozitivu ka negativu," hatete Ministru.

Iha fatin hanesan Prezidente Parlamentu Nasionál (PPN), Deputadu Aniceto Longuinhos Guteres Lopes, husu ba deputadu hotu no funsionáriu inklui tékniku sira hotu atu prepara-aan hodi bele simu teste SWAB sei oferese husi ekipa Ministériu Saúde.(*)