Hosi observasaun www.tempotimor.com iha fatin teste Sala MTK nian, kuaze maioria funsionariu tantu mane no feto hosi kargu xefia too funsionariu babain besik atus resin hola parte teste ne'ebé halao hosi ekipa saúde.
Prosesu teste ne'e rasik halo liuhosi regista naran hafoin ne'e teste swab, enkuantu iha mos funsionariu balun ne'ebé mak seidauk hola parte iha teste refere tamba la tama servisu iha segunda (08/03).
Situasaun iha fatin teste mos kuaze maioria fungsionariu MTK kolabora ho diak mesmu balun paniku no balun hamnasa tamba bainhira remata teste sira senti makili ho prosesu teste.
"Senti makili fali, mais diak tamba lalais deit no hau hein rezultadu teste deit," dehan fungsionariu ne'ebé lakohi atu publika nia identidade.
Alende ne'e, ekipa teste hosi MS ida ne'ebé mos lakohi atu públika naran hatete, prosesu teste ne'e kleur tamba ami ne'ebé destakadu mai halo teste ba fungsionariu MTK hamutuk nain 5 deit.
Entertantu rezultadu teste ne'ebé halo hosi ekipa saude ba komunidade iha BTN Tasi-tolu Dili rezulta ema nain rua pozitivu Covid-19 ne'ebé deskonfia ida hosi Diretór Geral (DG) Tekniku husi Ministériu Transporte no Telekomunikasaun (MTK) ho naran inisial G.
Tuir informasaun ne’ebé www.tempotimor.com rekolla husi fonte ne’ebé besik autoridade, iha loron domingu (07/03) katak, Diretor Geral ne’ebé deskonfia pozitivu ne’e hela iha Bairu BTN Tasi-Tolu, aldeia Terra Santa, Suku Madohi.
“DG pozitivu. Nia hela iha BTN Tasi-Tolu no semana kotuk nia hala’o enkontru ho ema barak inklui ho nia Ministru iha possibilidade transmite ba ema barak”, informa fonte ne’e.(*)