Print this page

DG Ida iha MTK Deskonfia Pozitivu Covid-19, Possibilidade Konfinamentu iha Dili

Tempotimor (Dili) - Diretór Geral (DG) Tekniku husi Ministériu Transporte no Telekomunikasaun (MTK) ho naran inisial G deskonfia hetan Covid-19, hafoin fó sai rejultadu teste iha loron 7 fulan-marsu tinan 2021. Possibilidade konfinamentu iha kapital Dili.

Tuir informasaun ne’ebé www.tempotimor.com rekolla husi fonte ne’ebé besik autoridade sira, iha loron domingu (07/03) katak, Diretor Geral ne’ebé deskonfia pozitivu ne’e hela iha Bairu BTN Tasi-Tolu, aldeia Terra Santa, Suku Madohi.

“DG pozitivu. Nia hela iha BTN Tasi-Tolu no semana kotuk nia hala’o enkontru ho ema barak inklui ho nia Ministru iha possibilidade transmite ba ema barak”, informa fonte ne’e.

Fonte ne’e mós reforsa, autoridade sira hala’o ona enkontru hodi hein desizaun Konsellu Ministru extraordinariu iha loron 8 fulan-marsu tinan 2021.

“Ami foin hasoru malu. Aban dader konsellu Ministru extraordinariu, toma desizaun konfinamentu hanesan fulan-Abril tinan 2020 ka Cerca Sanitária iha Dili laran”, nia afirma.

Hafoin ekipa Sentru Integradu Jestaun Kríze (SIJK) fó sai rezultadu teste ka restreiu kona-ba pasiente na'in-rua ne'ebé pozitivu Covid-19, Portavós Sala Situasaun-Sentru Integradu Jestaun ba Krize (SS-SIJK), Rui Araújo hatete, pasiente sira ne'e, deskonfia nu’udar funsionáriu administrasaun públiku ne'ebé servisu iha ministériu balu.

"Sira na'in-rua servisu iha administrasaun públikas iha ministérius balu", nia afirma.

Tanba ne’e, husu ba populasaun iha kapital Dili hahú loron domingu (07/03) kalan, atu kalma, labele pániku, tuur hakmatek, no iha loron 8 fulan-marsu tinan 2021 dadeersan, sei laiha nesesidade atu halo movimentu sai.

Ho Ida ne’e populasaun la presiza halo movimentu sai, no SIJK sei hato'o propósta konkreta ba Konsellu Ministrus (KM) atu foti desizaun kona-ba medida ne'ebé sei foti ba iha kapital Dili.

"Ohin kalan, sala situasaun sentru integradu jestaun krize, koordena ona ho autoridade seguransa sira atu temporáriamente blokeia lai aldeia Terra Santa, hahú husi rate Raikotu ninian, ba to'o iha rohan, populasaun hakmatek lai iha uma-laran, labele movimentu tuun-sa'e, fó tempu ba ekipa sira konjunta saúde ninian buka tan fali kontatu besik husi sira na’in-rua ne'ebé ohin ita deteta pozitivu", hatete Rui Maria Araújo iha Sala Situasaun SIJK, domingu (07/03).

Ministru Transporte no Telekomunikasaun, José Agustinho da Silva konfirma, diretór ne’ebé deskonfia pozitivu ekipa saúde lori ona ba fatin izolamentu Covid-19.

“Ha’u foin telefone ba DG, nia dehan parte saúde lori ona nia ba sala izolamentu”, nia afirma. (*)

Rate this item
(1 Vote)
Last modified on Sunday, 07 March 2021 23:29
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items