Kordenadóra Jerál Komisaun Covid-19, Odete da Silva Viegas, afirma, kona-ba rejista ai-moruk sira ne'ebé fa'an iha online, antes ne'e diresaun nasionál farmasia mós iha ona implementasaun politíka estratejia ba distribuitor ou importadór sira oinsa atu rezista lisensiamentu liu-husi online.
Nune'e, dadaun servisu regulár oinsa hetan lisensiamentu ba fa'an ai-moruk iha online la'o hela, presiza reforsa tan de'it.
“Preokupasaun ne'e, sei enkamiña ba iha gabineti atu bele tun iha terrenu haree situsaun ida-ne’e, tanba saida de’it mak relasiona ho ai-moruk ne’e substánsia kimíku ne’ebé bele mós fó efeitu negativu ba ita-nia komunidade,” dehan Nia iha palásiu Cinzas kaikoli, sesta (19/02/21).
Tanba, dadaun iha ona gabineti ida husi Ministériu Saúde ne'ebé hala'o papél atu kontrola lisensiamentu sira ba ai-moruk fa'an online, entaun bele haree hodi fó de'it ba ema ne'ebé merese duni ou kredivél sai importadór ka distribuitor ai-moruk.
Bainhira, ema sira ne'ebé hetan ona lisensa atu fa'an ai-moruk iha online, ekipa inspetor saúde mós sei halo monitorizasaun regular hodi bele kontrola ho di'ak.
"Monitorizasaun ida-ne’e tempu uluk liu-ba ekipa sempre halo no balun sei hetan sansaun karik ai-moruk ne’ebé mak sira hatama la’ós ai-moruk ne’ebé la rejista iha diresaun ne’e rasik", Nia fo lembra
Parte Ministériu Saúde mós iha ona hanoin ida atu dezenvolve ai-moruk herbal, tanba dadaun iha ona kliníka barak.
“Ita iha hela lei farmasia númeru 12/2004 ne’ebé mak iha, buka atu halo fali revizaun ba politíka ho lei refere, nune’e utiliza ai-moruk herbal ne’e bele integra di’ak liu tan iha politíka ne’e rasik”, tenik Odete. (*)