Tuir kordenador jerál Covid-19, Odete da Silva Viegas, media nia papel importante, nune'e Ministériu Saude (MS) servisu hamutuk ho World Health Organization (WHO) Timor-Leste, no UNICEF hodi halo advokasi ba media sira iha Timor-Leste kona-ba halo vasina Covid-19.

Papel media nian importante tebes, tan ne'e halo advokasia ho intensaun atu kontribui ba servisu saúde ho parseiru sira nian hodi halo prestasaun diak ba komunidade.

"Covid-19 mosu iha tinan 2020, ita halo kedas advokasia ba ita bo'ot sira, tanba ne'e mak sempre hateten, ita bo'ot sira nia papel importante atu bele kontribui ba servisu saúde nia ho parseiru sira halo prestasaun ne'ebé diak ba ita nia komunidade em jerál ba ita hotu", Dehan Odete iha Palásiu da Cinzas Kaikoli, (19/02/21).

Halo prevensaun ba moras Covid-19 la'os fasil, maibe ho ita hotu nia servisu hamutuk konsege atinji susesu balun iha Timor-Leste.

"To'o ohin loron Timor-Leste seidauk Rejista kazu ne'ebé grave no laiha kazu ne'ebé mate, ne'e siginifika susesu ida ba Timor-Leste, maske iha limitasaun rekursu ne'ebé barak, maibe konsege ultrapasa situasaun ida ne'e, tanba nasaun seluk la konsege hanesan Timor halo", Nia afirma

Tuir nia, Ministériu Saúde ho parseiru sira mesak servisu hodi halo prevensaun ba moras Covid-19 labele, maibe ho prezensa media nian servisu bele la'o diak, tanba liu-husi informasaun sira ne'ebé media transmiti bele motiva no eduka sosiedade hotu.

"Atu bele konvense ita nia komunidade, ita nia familia, ita nia viziñu, imi nia papel ne'e importante, tanba ami mesak labele halo, pareseiru sira mesak labele halo, media papel importante tebes, se imi mak fo informasaun sala ita hotu servisu ne'e sala hotu", Nia akresenta

Liu-husi advokasia ne'e, Ministériu Saúde no parseiru sira sei hamutuk ho media sira hodi halo loos informasaun balun ne'ebé laloos, tanba bainhira susesu mai husi ita hotu nia servisu.

"Se ita bo'ot sira fo sai informasaun ne'ebe sala, signifika ita bo'ot sira mak sala uluk mak Ministériu Saúde sala tuir tan", Nia hateten. (*)