Tempotimor (Dili) - Governu liuhusi ministériu Saúde (MS) hamutuk ho parseiru sira defini totál 20% husi populasaun Timor-Leste mak sei hetan uluk vasinasaun tanba konsidera risku ba propagasaun pandemia Covid-19.

Ministra Saúde Odete Belo, esplika governu hetan apoia finanseira husi governu Austrália hodi sosa vasina husi covac advance facility ho tipu Astrazeneca.

Orsamentu ne'ebé governu Austrália oferese hamutuk millaun $80 ba governu dezenvolvidu sira inklui Timor-Leste.

"Apoiu gratuita liuhosi covac facility iha-ne'ebá iha OMS no UNICEF ne'ebé sira defini ona kritéria ba populasaun sira-ne'ebé mak risku aas atu hetan vasina, kost facility ne'e defini kedas presentajen ema ho risku aas bele hetan ou kontajia ho Covid-19 mak 20% husu totál populasaun," nia dehan.

Odete hatutan, ekipa tékniku Ministériu Saúde rasik defini ona 20% populasaun ne'ebé sei hetan vasina dahuluk Astrazeneca mak hanesan 3% ba liña frente sira mak pesoál saúde, funsionáriu alfándega, migrasaun, polísia, profesór, FALINTIL-FDTL no Relijioza sira.

Nune'e 5% ba populasaun katak ema ne'ebé ho moras krónika hanesan diadetes, kardiátiku, rins inklui mos seluk tan, 8% ba idade idozu sira katak tinan 60 ba leten no 4% ba grupu seluk mak populasaun ne'ebé hela iha fronteira hanesan Suai, Bobonaro no Oecusse.

Odete akresenta, sei esforsu atu 80% husi populasaun Timor-Leste sei hetan mós vasina, nune'e governu iha dalan rua hanesan uza oportunidade atu asesu fundu hosi bilateralmente ho governu Austrália, no aternativa seluk mak governu sei aloka osan rasik hodi sosa vasina.(*)