Diretór Ezekutivu ba Sentru Intergradu Jestaun Krize (SIJK), Brigadeiru-Jenerál, João Miranda “Aluk” informa, sorumutu ho Primeiru Ministru Taur Matan Ruak ne'e ko'alia kona-ba oinsa atu reativa SIJK.

"Ohin señor Primeiru Ministru bolu ami para atu ko'alia kona-ba oinsá mak atu reativa fila-fali sala situasaun ne'ebé mak hahú implementasaun estadu emerjénsia iha primeira faze nian, tanba ita haree katak, situasaun moras ida-ne'e risku ne'e, ita bele dehan katak, loron ba loron ne'e ameasa hela ita," dehan Aluc hafoin sorumutu ho Primeiru Ministru Taur Matan Ruak iha Palásiu Glvernu, segunda, (01/02/21).

Atu reativa SIJK ekipa ne'ebé atu lidera sei hein despaxu husi Primeiru Ministru Taur Matan Ruak.

"Ami sei hela despaxu husi Primeiru Ministru nian, para depois adekua estrutura ida-ne'ebé mak atu kompoin hodi implementa medida hirak ne'e", dehan nia

Planu reativa ba SIJK ne'e, estrutura hanesan uluk, maibé ninia kompozisaun númeru sei redus.

Ho preokupasaun situasaun Covid-19 ne'ebé agora mosu ne'e mak atu reativa SIJK nune'e koordena ho Ministériu Saude hodi responde.

"Pur a kazu transmisaun lokál seidauk iha, mais dala hira intervista ha'u ko'alia katak, di'akliu ita prevene duke ita kura, ne'ebe mezmu sidauk iha transmisaun lokál di'akliu ita prevene ho medida;ne'ebé ita hanoin katak, bele evita transmisaun lokal," Aluc fundamenta.

Reativa SIJK ne'e sei foka liu ba iha área fronteira, liuliu munisípiu Covalima, Bobonaro no RAEOA. (*)