Sidadaun nain ida ne'ebé pozitivu ba Covid-19, dadaun ne'e, baixa hela iha sala izolamentu Vera Cruz, hamutuk ho pasiente Covid-19 sira seluk.
"Ohin 27 janeiru 2021 Ministériu Saúde rejista tan sidadaun Timor-oan nain 1 ne’ebé konfirmadu kazu Covid-19", dehan Koordenadór Pilár VII Covid-19, Nilton do Carmo da Silva ba jornalista sira, iha Palásiu das Cinzas Caicoli, Díli, kuarta (27/01).
Nilton akresenta, pasiente mane ne'e ho idade 27 no iha ona sintomas hanesan, isin kole no sente moras bainhira tolan kaben.
"Iha 24 janeiru, pasiente ne’e informa ba médiku, iha fatin kuarentena katak, iha sintomas, ho ida ne’e ekipa vijilánsia responde kedas, hodi halo teste swab ka foti amostra, rezultadu teste husi laboratóriu relata katak, sidadaun ne’e pozitivu Covid-19, ho nune’e ekipa jestaun kazu iha Pilár VII evakua kedas pasiente refere ba iha izolamentu Vera Cruz", dehan Nia.
Nia informa, Sidadaun ne'ebé pozitivu Covid-19 ne'e, mai husi Indonézia, hamutuk ho pasiente pozitivu hirak ne’ebé dadaun ne’e, iha sala izolamentu Vera Cruz. Sidadaun sira ne'e, tama mai Timor-Leste liu husi pontu entrada Batu-Gede, iha kuarta loron 20 fulan janeiru, semana kotuk. No durante ne'e, hela iha kuarentena ótel Novo Horizonte, Díli.
"Atu informa mós ba públiku katak pasiente Covid-19 iha izolamentu Vera Cruz en jerál sira-nia kondisaun di’ak hotu, inklui ida-ne’ebé ho idade 64", dehan Nilton.
Koordenadór Pilár VII covid-19 informa, tuir dadus, dadaun ne'e, TL iha kazu komulativu hamutuk 68, kazu foun ida no atuál pasiente Covid-19 ne'ebé baixa iha sala izolamentu Vera Cruz, hamutuk ema nain 18.(*)
