Koordenadora Jerál Komisaun Nasionál Covid19, Odete Viegas lori Ministériu Saúde nia naran husu ba públiku, autoridade lokál no populasaun tomak inklui entidade hotu, iha liña fronteira terrestre ho Indonézia, tanba númeru kazu pozitivu iha TL kontinua rejista.
"Atu-bele kontrola nafatin movimentasaun sidadaun hirak ne'ebé mak hakat-ba mai iha fronteira ilegalmente, hodi nune’e labele monu ba risku no hetan da’et moras COVID 19, no lori mai hada’et tutan iha Timor-Leste nia laran", dehan Odete da Silva Viegas iha Palásiu-das-Cinzas, Kaikoli, kuarta (13/01).
Nia mós husu ba komunidade, liuliu ba joven sira, atu nafatin kolabora no kumpri ho disiplina regra distansiamentu sosiál koletivu, uza nafatin maskára, bainhira sirkula iha fatin públiku no fatin ne’ebé iha ema barak, hanesan fatin selebrasaun relijioza, loja, servisu fatin, bazar no seluk tan.
"Fase liman beibeik, no evita kose-liman ba ibun, inus no matan", nia fó hanoin.(*)