"Ha'u mai haree, ha'u kontenti ho servisu emprezáriu Timor-oan sira-ne'ebé halo iha ne'e, mais ha'u mós husu ba Ministériu Saúde para buat sira- ne'ebé seidauk kompleta ne'e servisu lalais uitoan para kompleta tiha, nune'e tempu badak ita bele uza daudaun ona", Xefe Governu ko'alia bainhira halo vizita ba ospitál Lahane, segunda (11/01).
Xefe Governu husu halo reabilitasaun lalais nune'e transfere fali pasiente sira husi Hospital Nacional Guido Valadares (HNGV) ba ospitál refere, tanba espasu la to'o ona.
"Tanba dalaruma espasu kuartu mós la to'o, fatin la to'o, ema bou hamutuk, liuliu kuandu estrada di'ak ambulánsia barak ema hotu-hotu lakohi ona iha ospitál referál sira, hakarak mai hotu iha Dili, entaun se ita hadi'a ida-ne'e halo akabamentu remata tiha provavelmente ita bele uza tán ida- ne'e," nia akresenta
PM esplika, la'os de'it ba moras sira normál, mas ein-kazu Covid ne'e aumenta tenke iha ona fatin, duke buka tán fatin.
"Segundu, husu ba Señora Ministra Saúde ho nia ekipa para se bele halo reabilitasaun ba ospitál ida leten, ha'u- nia hanoin oinsá mak hadi'a para ita transfere moras sira- ne'ebé kontajioza mai iha-ne'e, tanba iha kraik ne'e hanesan ohin hau dehan ita hanoin para abanbainrua hadi'a, maibé ita-nia kondisaun akumulasaun ne'e boot iha-ne'ebá, entaun se ita tau balun iha-ne'e di'akliu, liuliu hanesan moras sira-ne'ebé hanesan Tuberkulozia (TBC), moras ida-ne'ebé ambienti ida mais dook husi sidade ventilasaun anin di'ak malirin ituan", PM esplika. (*)