Print this page

Ema na’in-rua pozitivu COVID-19 Otél Vila Verde

By January 03, 2021 2495
Imajen Covid 19 Imajen Covid 19 Foto Tempo Timor

Tempotimor (Dili) — Ministériu Saúde (MS) anunsia, ohin katak ema na’in-rua enfrenta pozitivu COVID-19 iha Otél Vila Verde no kontinua estende tan kuarentena loron 14 ba ema sira-ne’ebé kumpri hela konfinamentu iha otél refere.

Tuir komunikadu imprensa ne’ebé Tempotimor asesu, domingu ne’e atualiza dadus Covid-19 iha Timor-Leste ne’ebé kazu komulativu iha na’in-46, kazu foun +2 (kazu pozitivu foun) no atuál baixa na’in-15.

Kronolojia kazu foun pozitivu mensiona mane ho idade 24, asimtomátiku nu’udar pasajeiru mai husi Portugál iha 20 dezembru 2020 ho TAP Airlines no tránzitu iha Madrid.

Iha data hanesan sai husi Madrid ba Doha ho Qatar Airlines no tránzitu iha Doha, iha 21 dezembru viájen husi Doha ba Malázia no toba kalan ida iha ótel sama-sama airport Kuala-Lumpur nune’e loron 22 dezembru husi Kuala-Lumpur Malázia mai Dili ho AirAsia.

Nune’e mós mane ho idade 34, asimtomatiku, husi Londres, Reinu Unidu iha 20 dezembru ho Qatar Airlines no tránzitu iha Doha.

Iha loron 21 dezembru viájen husi Doha ba tránzitu iha Malázia, iha 22 dezembru husi Malázia mai Dili ho AirAsia.

Iha komunikadu imprensa ne’e haktuir, iha loron 22 dezembru aviaun AirAsia tún iha Dili ho pasajeiru hamutuk na’in-100. Pasajeiru hirak ne’e na’in-14 hela iha kuarentena Otel Vila Verde no na’in-78 seluk hela iha kuarentena Otel Regal Apartament, otel Time Square, otel Fortuna, otel Carla Mension.

Nune’e Sawab foti iha loron 30 dezembru 2020, no rezultadu relata iha 2 janeiru 2021. Estatutu pasajeiru hirak ne’e hotu kategoria close contact tanba iha ona istória kontaktu ho na’in-1 pozitivu detetadu iha Malázia ne’ebé la konsege mai Timor-Lete.

“Kazu pozitivu na’in-2 ne’e hela iha otel Vila Verde. Tanba ne’e sidadaun sira-ne'ebe konfina iha ótel Vila Verde hahú ohin estende tan kuarentena loron 14,” refere komunikadu imprensa ne’ebé fó-sai hosi Koordenadór Pilár COVID-19, Nilton do Carmo da Silva.

Ikus liu nafatin lori Ministériu Saúde nia naran nomós ekipa covid-19 hakarak hato’o mensajen ba populasaun hotu katak sei iha estadu emerjénsia presiza kumpri regra sira-ne’ebé ministériu saúde fó sai ona atu prevene moras covid-19.

“Ita hotu-hotu hatene ona katak saúde iha idak-idak nia liman rasik tanba ne’e di’akliu ita prevene antes halo tratamentu,” hateten Koordenadór Pilár COVID-19. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com