Arse-Bispo Arkedioseze metropolitanu Dili, Dom Virgilio Do Carmo da Silva SDB deklara, sarani sira sei akompana de'it misa husi kanal televizaun no radiu.
"Relasiona ho situasaun Covid ita hotu hatene dadaun ne'ebe la'o dadaun ne'e mak konferensia episkopal timorense fo orientasaun no desizaun sira kona-ba oinsa ita sei selebra ita nia tinan foun 31 dezembru aban ninian nune'e mos ba dia 1 de janeiru festa Mae de Deus ninian", deklara Dom Virgilio liu-husi konferensia imprensa iha rezidensia Amo Bispo bidadu lesidere, kurta (30/12).
Amo Bispo Dili ne'e hatutan, pontu primeiru iha orientasaun ne'e mak husu ba Amu Lulik sira bele kumpri, eh divulga dekretu sobre Covid-19 ninian.
"Segundu, tuir dekretu ida ne'e duni amo Bispo sira desidi katak, selebrasaun liturjika sira hotu liu-liu iha loron rua nia laran ba dia 31 dezembru ho dia 1 de janeiru laiha partisipasaun povu, terseisu sarani sira tuir selebrasaun iha sira nia uma bainhira misa liu-husi radiu ou televizaun, biar la simu kominaun eukaristika, maibe halo kominaun espiritual", dehan Dom Virgilio.
Tanba ne'e, hakarak fo hanoin ba sarani sira katak, iha dia 31 dezembru kalan tuku 8:00 sei iha misa transmisaun direita husi GMNTV, no ba dia 1 de janeiru tuku 8:00 dader sei iha mos misa.
"Bai-bain ita hatene katak, misa sei kominaun, misa la kompletu, maibe haree ba situasaun ida hanesan ne'e, tempu kalamidade publiku iha mundial uma kreda despensa sarani sira husi kominaun eukaristika no konvida sarani sira halo kominaun espiritual",tenik Bispo.
Atu evita perigu de kontagiu, husu ba Amu Lulik sira tuir rigorozamente orientasaun no desizaun Amo Papa ho komferensia episkopal Timorense ninian ne'e.
"Ba konventus seminarius no komunidade relijioja bele selebrasaun ba de'it membru komunidade ninian, orientasaun sira ne'e vigora dezde ohin fo sai ninian to'o orientasaun seluk ne'ebe tun fila-fali, iha tempu susar hanesan ne'e ita halo buat ne'ebe bele, buat ne'ebe ita labele ita husi iha maromak nia liman no husu ba sidadaun ida-idak atu hola responsablidade ba povu hotu-hotu nia diak", Amo Bispo relata.
Antes ne'e, iha loron segunda (28/12), informasaun husi ministeriu saude deklara ofisial liu-husi konferensia imprensa katak, Pasiente Covid-19 ne'ebe dadaun iha hela sala ijolamentu hamutuk na'in 13 no sei hein rezultadu teste na'in 397, eh ema kumpri hela loron 14 iha kuarentina hamutuk na'in 349, iha Dili na'in 279, iha Munisipiu 70 no tama auto kuarentina na'in 136. (*)