Tuir Ministra Saúde (MS) Odete Maria Freitas Belo, iha sorumutu entre liña ministeriál sira sira, MSSI aprezenta proposta ida oinsa mak atu halo redusaun ba pobreza iha TL.
"Ohin MSSI aprezenta planu estratéjiku ida kona-ba reduzaun pobreza inklui mós ligasaun ba servisu saúde nian," dehan MS Odete iha edifísiu MSSI Kaikoli, Segunda (26/10).
Nia mós dehan, asuntu redusaun pobreza ne'ebé liga ba saúde nian mak oinsa fó asisténsia ba inan isin-rua no bebe sira.
"Oinsa mak haree ba inan isin-rua sira-nia kondisaun no moras krónika sira, entaun ami haree katak programa ne'e ne'e importante, tanba haree ba inan isin-rua mak iha uma laran buat ne'ebé atu konsumu para fó saúde ba bebe ne'e falta, entaun sai problema, tanba ne'e MS nia parte mak fó konsulta, maibé kona-ba hahan nian ne'e MSSI mam sei responsavél," katak Nia.
Governante ne'e mós dehan, fatór ne'ebé kontribui ba pobreza iha TL mak liuhusi menus koñesimentu.
"Primeiru, ita haree ba povu ne'e rasik, ita-nia koñesimentu oinsa atu dezenvolve ita-nia aan rasik hodi hetan ita-nia rendimentu aas mós ita sei menus tebes, tanba iha área barak mak ita presiza halo hodi hasa'e rendimentu familia nian, maibé ita sei menus teb-tebes, tanba ne'e presiza halo kapasitasaun ba ita-nia populasaun sira," nia dehan.
Iha fatin hanesan Vise Primeira Ministra no Ministra Solidariedade Sosiál no Inkluzaun (MSSI) Armanda Berta dos Santos katak, enkontru ho liña ministeriál sira kona-ba estratéjia nasionál ba protesaun sosiál nian.
"Estratéjia nasionál ba protesaun sosiál ne'e iha 2016 kedas paradu iha governu anteriór, tanba ne'e MSSI iha ona hanoin, oinsa atu halo revizaun ba estratéjia ida ne'e, tanba molok lori ba reuniaun Konsellu Ministru (KM) presiza iha diskusaun husi ministériu sira," nia dehan.
Entretantu, proposta estratéjia nasionál ba protesaun sosiál ne'e iha tempu besik sei lori ba KM hodi diskute. Nune'e Ministériu sira ne'ebé partisipa iha diskusaun ba proposta MSSI nian ne'e mai husi Ministériu Saúde, Ministériu Edukasaun Juventude no Desportu (MEJD), Ministériu Ensinu Superiór Siénsia no Kultura (MESSK) no partisipa mós husi Diretór Jerál sira.(*)