Vise Ministru Saúde Bonifácio Maucoli hatete, maske kazu pozitivu Covid-19 balun ema deskonfia estadu mak politika, maibé di’ak liu komunidade sira labele haree kestaun ne’e hodi ba halimar fali iha fatin izolamentu nia oin.
"Kazu pozitivu ne'ebé iha ne'e dala-ruma ema dehan ne'e estadu mak naran halo de'it ka politiza, maibé realidade mak ida ne'e, ita detekta liu husi teste ida, teste ne'ebé akuradu, tanba liu husi Polymerase Chain Reaction (PCR) ne'ebé diferente ho nasaun viziñu ne'ebé uza de'it Rapid Diagnostic Test (RDT)," dehan Bonifácio ba jornalista sira, Kuarta (12/08).
Ho fasilidade ne’ebé kualidade ne’e, nia hatete, iha duni garantia katak ema sira ne’ebé tama iha fatin izolamentu ne’e pozitivu duni Covid-19.
"Ema ne'e pozitivu duni, maibé ho estadu lijeiru, tanba ida ne'e mak ita tau iha ne'ebá,” dehan nia.
Tan ne’e, nia husu ba komunidade sira ne’ebé hela besik fatin izolamentu atu tenke iha konsensia hodi dook husi fatin refere.