Login to your account

Username *
Password *
Remember Me

Timor-oan iha Kuarentena Buka Pesoal Saude ho Oan na'in 2 ne'ebé "Lakon" Hafoin to'o Dili

Pasiente ida ho nia oan feto na'in rua ne'ebé deskonfia la tama kuarentina hafoin fila husi estranjeiru, hamrik hela iha terminal aeroportu internasional prezidente Nicolao Lobato Komoro hodi  konversa ho pesoal sira ne'ebé servisu iha Aeroportu iha loron 05 Fulan Agostu tinan 2020.  Pasiente ida ho nia oan feto na'in rua ne'ebé deskonfia la tama kuarentina hafoin fila husi estranjeiru, hamrik hela iha terminal aeroportu internasional prezidente Nicolao Lobato Komoro hodi konversa ho pesoal sira ne'ebé servisu iha Aeroportu iha loron 05 Fulan Agostu tinan 2020. Foto SUPLAI

Tempotimor (Dili)-Timor-oan balun ne'ebé foin fila husi Indonezia ho aviaun Citilink iha 5 Jullu buka hela ema na'in tolu seluk, pesoal saude ida ho nia oan-feto na'in rua, ne'ebe fila hamutuk ho sira, maibé la tama iha kuarentena. Sira deskonfia ema balun fasilita sira na'in tolu hodi fila ba uma.

Timor-oan ida ne'ebé fila husi Indonezia hamutuk ho ema na'in tolu no daudauk ne'e hela iha kuarentena dehan, Timor-oan sira ne'ebé fila mai Timor ho aviaun Citilink tama hotu kuarentena, menus mak ema na'in tolu.

Nia dehan, pesoal saude ne'e moras no halo tratamentu iha Jakarta no aproveita fila ho aviaun Citilink bainhira governu aluga aviaun hodi ba tula mate-isin no trabalador timor-oan sira iha rai li'ur.

"Ami-nia maluk, ferik ida ho nia oan feto na'in 2, ne'ebé ami mai hamutuk husi Jakarta agora la tama iha kuarentena ida dadaun ami hela ba ne'e, la hatene sira ba fali ne'ebé karik, ami mós la iha informasaun," dehan fonte ne'e via telefone, Sabadu (08/08).

Fonte ne'e deskonfia, ema na'in tolu ne'e fila ona ba uma, tanba grupu ne'ebé mai hamutuk hotu-hotu tama iha kuarentena ida, no kuartu balun iha kuarentena refere sei mamuk, tan ne'e fonte ne'e la fiar sira na'in tolu tama kuarentena seluk.

"Kuarentena ida agora ami tama ne'e ami husi grupu ida mai hamutuk husi Jakarta, ami sira seluk ne'e mai hotu iha fatin ne'e, depois iha ne'e kuartu barak mak sei mamuk hela, maibé sira na'in tolu ba fali ne'ebé ami ladun hatene," dehan nia.

Tuir fonte ne'e nia koñesimentu, inan ne'ebé la tama kuarentena ho nia oan feto na'in rua ne'e, nu'udar pasiente ne'ebé transfere husi TL ba Jakarta hodi halo tratamentu saude.

"Ha'u mós hein hotu pasiente, ami hamutuk iha ospital ida de'it no mai iha dia 5 mós husi Jakarta ba Bali no mai Dili sa'e hamutuk aviaun ida, maibé, agora mai kuarentena sira na'in tolu laiha," dehan nia.

Fonte ne'e hatete, total pasiente ne'ebé halo tratamentu iha Jakarta no fila hamutuk iha 5 Jullu hamutuk ema na'in 6, no ema ne'ebé akompaña pasiente iha na'in 12.

Bainhira to'o Aeroportu Komoro no tama iha kuarentena, nia dehan, pasiente na'in lima no nia familia na'in 10 de'it mak hela iha kuarentena, enkuantu pasiente na'in ida ne'ebé mós nu'udar pesoal saude ho nia oan na'in 2 la tama.

"Pasiente seluk husi Jakarta ho nia familia hotu-hotu tama kuarentena iha fatin ida de'it, mais agora sira na'in tolu iha ne'ebé? Tanba sa mak ami sira seluk ne'e tama kuarentena, sira la tama?," nia preokupa.

Pasiente no familia pasiente ne'ebé tama kuarentena preokupa, laos de'it tanba sente injustisa, maibé mós tanba tauk na'in tolu ne'e bele hadaet Covid-19 ba sosiedade, tanba sira foin fila husi nasaun afetadu no seidauk iha garantia katak sira livre husi Covid-19.

Ho preokupasaun ne'e, pasiente no familia pasiente husu justifikasaun no informasaun husi pesoal saude ne'ebe halo vizilansia iha kuarentena ne'ebé sira hela ba.

"Ami husu ona justifikasaun ba pesoal saúde na'in rua iha ne'e, maibé sira dehan sira mós voluntariu ne'ebé la hatene, dehan orsida mak informa took," fonte ne'e hatete.

Fonte ne'e dehan, tuir informasaun husi pesoal saude balun, pasiente ho nia oan na'in rua ne'e fila ona ba nia uma.

"Nia maluk sira iha ne'e dehan nia la tama kuarentena, ba fali uma. Agora, maske nia doutora mós laiha garantia katak nia ho nia oan-feto na'in 2 livre husi virus. Sorte boot se nia la lori virus ba uma, mais se nia lori virus ne'e ba uma karik oinsa? ne'e bele fó ameasa boot ba ita-nia sosiedade," nia lamenta.

Molok ne'e, iha 5 Agostu, Sekretariu Estadu Formasaun Profisional no Empregu (SEFOPE) Alarico do Rosario simu Timor-oan na'in 149, inklui mate isin rua iha aeroportu internasional Nicolau Lobato Komoro.

Iha momentu ne'eba, Alarico hatete, Timor-oan sira ne'ebé mai husi estranjeiru obrigatoriu tenke kumpre loron 14 iha kuarentena.

"Sira ne'e mai obrigatoriu tenke ba kuaretena tanba regras saúde mak haruka", dehan nia.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter