Liuhusi serimonia entrega ekipamentu ba Ministériu Saúde (MS), iha Sentru Saúde
Komoro, Diretora Nasionál Saúde Públika (DNSP), Isabel Gomes hateten, serimonia ne’e importante tebes atu prevene ba Covid-19 inklui moras seluk tan.
EUA entrega ekipamentu ba kontrolu no mós prevensaun ba infeksaun inklui ekipamentu ba bee no saneamentu nu’udar meiu ida ba prevensaun Covid-19, moras sira seluk ne’ebe afeta husi fale ijene no saneamentu.
Nia mos dehan, ekipamentu sira ne’ebe apoiu husi EUA no UNICEF ne’e sei destinadu ba munisipiu lima.
“Ekipamentu sira ne’e sei destinadu ba munisipiu lima mak hanesan Baukau, Dili, Covalima, Manatutu no Ermera,” dehan DNSP Isabel Gomes, ba jornalista sira iha Komoro, hafoin reperezenta Ministériu Saúde (MS) ba serimónia entrega no simu ekipamentu husi EUA no UNICEF iha TL, Tersa (28/07).
Ho ekipamentu sira ne’ebe iha, DNSP husu ba Diretora Saúde Munisípiu Dili (DSMD) ho nia ekipa atu uza ekipamentu sira ne’e ho di’ak no tempu ne’ebe naruk.
Iha fatin hanesan, Embaixadora Amérika iha Timor Leste, Kathleen M. Fitzpatrick, kongratula MS no governu TL ne’ebe esforsu aan tebes hodi kombate Covid-19.
“Profisionál saúde no primeiru sokoru barak ne’ebé serví ho laran tomak, merese atu hetan ita hotu nia agradesimentu espesiál. Hanesan ita-hotu hatene, totál kazu menus no laiha ona kazu foun dezde fulan-Abríl to’o agora,” dehan nia.
Nia afirma, maske laiha ona kazu foun, maibe TL nia lideransa kontinua guarda nasaun no povu TL.
“Ne’e la’ós tempu atu husik livre ita ninia guarda. Virus ne’e sei eziste iha mundu no Covid-19 sei sai hanesan ameasa iha nasaun barak, inklui nasaun viziñu Indonézia,” nia tenik.
Entretantu, ekipamentu sira ne’ebe apoiu ba MS ho valor osan hamutuk rihun US$ 500.
“USAID anunsia ona apoiu orsamentu dolar rihun atus lima ($500,000) ba UNICEF iha fulan kotuk. Premiu ne’e hodi apoia komunikasaun risku, divulgasaun komunidade, kontrolu infeksaun, bee no saneamentu iha munisípiu sira balun no iha mos Sentru Saúde Komoro,” dehan Fitzpatrick.
Embaixadora afirma, projetu ne’e parte ida husi tokon $1.7 ne’ebé mak Estadus Unidus fornese hodi ajuda apoia Timor-Leste luta hasoru Covid-19. (*)