Kursu ne'e realiza liuhusi kooperasaun OMS Timor-Leste servisu hamutuk ho OMS Kuartél Jenerál iha Jenebra dezenvolve ona kursu foun iha lian Tetum  kona-ba Covid-19 nian, liu-liu parte prevensaun no kontrolu infesaun (PKI) ba virus COVID-19.

Kursu ba dahaat husi totál kursu 11 kona-ba COVID-19 ne’ebé disponivél ona iha lian Tetum. Kursu hirak ne’e agora disponivel iha OMS nia plataforma aprendizajen online, www.openwho.org. ka kursu ne'e bele asesu iha link  https://openwho.org/courses/COVID-19-IPC-TET no kursu hanesan iha lian Inglés bele asesu link ne’e https://openwho.org/courses/COVID-19-IPC-EN.

To’o agora, TL, konsege jere ho didi’ak hodi prevene moras ne’e hada’et iha komunidade nia leet. Maibé COVID-19 ne’e seidauk hotu, tanba kazu iha nivél globál kontinua aumenta, TL sei nafatin iha risku nia laran. Entaun PKI maka maneira ida efetivu liu hodi hapara Covid-19 nia hada’et.

"Entretantu, kursu OpenWHO kona-ba PKI ne’ebé kria iha lian Tetum, atu nune'e hodi prepara no treina pesoál saúde sira ho prátika atuál bazeia ba evidénsia ne’ebé foun liu kona-ba implementasaun PKI,” dehan Rajesh Pandav, Reprezentante OMS ba Timor-Leste, liuhusi komunikadu ne'ebé tempotimor.com asesu, Segunda (20/7).

Kursu ne’e, hanesan kursu Covid-19 sira seluk, hakerek hosi peritu PKI nian hosi mundu tomak ne’ebé iha ona esperiénsia servisu iha nasaun ho rendimentu aas no rendimentu ki’ik.

Atu hapara Covid-19 nia hada’et presiza halo prátika ba Prevensaun no Kontrolu Infesaun (PKI) ne’ebé di’ak. Tanba intervensaun PKI hanesan ezemplu, fase liman, halo distánsia fíziku no prátika respiratóriu ijiene, hirak ne’e hatudu ona rezultadu iha hamenus risku ba hada’et Covid-19.

“Kursu iha OpenWHO.org kona-ba Prevensaun no Kontrolu Infesaun (PKI) ba Covid-19 kria  hodi eduka ho prátika pesoál saúde sira atu prepara aan no prontu atu responde ba COVID-19; aprende kona-ba intervensaun sira ba prevensaun no kontrolu infesaun ne’ebé bele limita da’et husi ema ida ba ema seluk; no hanorin oinsá atu identifika, izola no relata suspeitu no kazu konfirmadu sira,” dehan Roderico Ofrin, Diretór Rejionál ba Emerjénsia.

Kompriende no halo prátika beibeik prinsípiu báziku hosi PKI nian la’ós de’it hamenus Covid-19 da’et maibé salva ema nia moris mós.

Kursu iha OpenWHO ne’e oferese gratuita ba ema sé de’it maka rejistu ho sira-nia enderesu email rasik. Di’ak liután, kursu iha OpenWHO ne’e aprende rasik, ida ne’e signifika bele aprende tuir tempu ne’ebé presiza hodi kompleta kursu hirak ne’e.

OpenWHO mós disponivel iha telemovel, ba telemovel iOS no Android. Ba telemovel android uza link ida ne’e no ba telemovel apple bele uza link ida ne’e hodi download no instala aplikasaun OpenWHO nian iha telemovel. Kona-ba www.openwho.org.

OpenWHO maka OMS nia plataforna interativu online hodi fahe koñesimentu ne’ebé introdús kursu tuir online ba responde saúde emerjénsia nian.

Dezde lansa iha tinan 2017, OpenWHO ajuda ona Organizasaun ida ne’e no nia parseiru hotu hodi bele fahe koñesimentu kona-ba salva ema nia moris ba pesoál saúde liña oin sira iha mundu tomak.

Agora daudaun, plataforma ne’e simu rejistrasaun ba kursu kuaze ema tokon 3.7 no sei iha ema maka tan rejistu foun lor-loron. (*)