MS Preokupa Komportamentu Timoroan ba Prevensaun COVID-19

Ministra Saúde Odete Maria Freitas Belo ko'alia ba jornalista sira hafoin serimonia enseramentu ba SIJK iha Sentru Konvensaun Dili, tersa (30/06). Ministra Saúde Odete Maria Freitas Belo ko'alia ba jornalista sira hafoin serimonia enseramentu ba SIJK iha Sentru Konvensaun Dili, tersa (30/06). Foto Isac Oliviera

Tempotimor (Dili)- Ministra Saúde (MS) Odete Maria Freitas Belo preokupa ho komportamnetu timoroan sira nian, relasiona ho prevensaun surtu Corona Virus (COVID-19), tanba tuir nia haree katak, timoroan sira la tauk ho virus ne’e, liuliu la kumpri regras prevensaun nian hanesan kaer liman, rei malu no la uza maskra.

"Atu prevene surtu COVID-19 ita mak tenke prepara no kuidadu ita nia aan par labele hetan moras ne'e no lala'ok atu prevene ne'e simples tebes. Tanba meius mak uza maskra, labele kaer liman no labele rein malu de'it. Ida ne'e simples ba ita atu halo, maibé ita la halo. Ita kuandu la halo prevensaun, ida ne'e posibilidade boot tebes moras atu kona ita. Tanba iha nasaun viziñu moras ne'e sei iha, entaun ita tenke tauk maibe ha’u hare hanesan ita la tauk. Ida ne'e mak sai hanesan problema", Odete hateten lia hirak ne’e, hafoin partisipa serimonia enseramentu ba SIJK iha Sentru Konvensaun Dili, tersa (30/06).

Odete mos dehan, ema estranjeiru sira atu tama mai rai laran presiza hato'o uluk karta koiñesimentu ba Ministeriu Saúde atu bele asegura no prevene moras Covid-19 da'et iha rai laran.

"Lala'ok sira atu mai ne'e la'os naran mai de'it, maibe sira tenke halo karta mai ita simu ou lae, depois haruka karta mai Ministeriu Saúde iha kedas ona kriteria katak, ita boot sira kuandu tama tenke iha sertifikadu livre husi moras Covid-19 no tenke tama karantina", Odete esplika.

Nia hatutan, kualkér ema ne'ebe mak atu tama mai rai laran liu-husi fronteira terestre no aeroportu presiza ba simu sira atu asegura.

"Sira kuandu tama mai iha aeroportu ita mak tenke ba foti sira atu nune'e asegura katak, sira ne'e ba iha fatin ne'ebe ita prepara", nia salienta.

Nune'e, daudaun ne’e, maski Estadu Emerjensia remata ona, maibe kuandu sidadaun ne'ebe de'it atu tama mai rai laran kontinua aplika regra tama kuarentena obrigatoriu no auto kuarentena.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.