Ezemplu ida akontese iha Suku Komoro ne'ebé sai nu'udar fatin ba governu hodi loke ofisialmente programa fahe subsidiu.
Fofoun bainhira Vise Primeira Minsitra dahuluk Armanda Berta dos Santos halo abertura ba pagamentu subsidiu sira iha suku Komoro, nia husu ba komunidade sira atu mantein distansia sosial.
"Distansia sosial ne'e importante, tanba ho situasaun Covid-19 ne'ebé ita enfrenta, entaun husu ba komunidade hotu atu kumpre regra sira ne'e," dehan Armanda iha suku Komoro, Tersa (09/06).
Maibé liu de'it menutu balun, hafoim Vise PM ne'e sees an, komunidade sira viola kedas regras distansiamentu fiziku ne'e.
Komunidade ida, Antonio Silva dehan, sira labele kumpre regras tanba loron manas no fatin atu hamahan an limitadu.
"Ema mos barak loos, depois loron manas tan, pasiensia ita ba hamriik hamutuk iha tenda okos mak hein naran de'it ona, tanba besik ona jam 11:00 maibe foin mak bolu ema kala na'in 15," dehan nia.