Hafoin desizaun ne’e, KM sei solusita ba Prezidente Repúblika Francisco Guterres Lu Olo, no PR Lu Olo sei husu tan ba Parlamentu Nasionál atu fó autorizasaun hodi bele dekreta EE ba loron 30 oin mai.
Relasiona ho surtu Corona Virus Deasses 2019 (Covid-19) ne’ebé hamate ona ema rihun ba rihun iha mundu tomak, Timor-Leste dala rua ona deside implementa estadu emerjensia.
Periodu dahuluk implementasaun EE hahú iha loron 28 Marsu 2020 no remata iha 26 Abril 2020, no periodu daruak EE hahú iha 28 Abril 2020 no sei remata iha 27 Maiu 2020.
Maibé, ho desizaun husi KM ne’e, iha posibilidade atu aumenta tan periodu EE ba loron 30. Posibilidade ne’e sai boot liu tan tanba haree mós ba mudansa politika ne’ebé akontese ona.
Tuir komunikadu imprensa ne’ebé www.tempotimor.com asesu, ohin, hatete, liu husi reuniaun extraordinaria KM aprova no husu PR Lu Olo atu estende tan EE ba datoluk.
"KM deside hodi solisita ba PR Lu Olo par estende tan estadu emerjénsia ba loron tolunolu tan, tanba EE ba periodu daruak sei remata iha 27 Maiu bainrua," dehan komunikadu husi KM, Segunda (25/05).
Iha karta ne'e sita razaun governu hodi husu atu estende EE tanba surtu Covid-19 afeta maka'as ba povu iha nasaun viziñu Indonézia.
"Nesesidade hodi halo estensaun ba estadu emerjénsia tanba solusaun ba epidemolójika no prolifersaun ba kazu kontájiu ba Covid-19 maka’as iha nasaun viziñu Indonézia ne'ebé hola parte iha Timor osidentál, tanba seidauk médida ne'ebé trava ba pandemia hodi evita transmisaun par rezulta kazu foun ba Covid-19 iha teritóriu nasionál, entaun dalan úniku mak estende estadu emerjénsia,” deklara KM.
Tuir KM, presiza tan estensaun tanba médida ne'ebé posivel iha dekretu ida ne'e mak sei kontribui ba loron tuir mai hodi labele iha tan kazu ativu iha teritóriu nasionál.
Entretantu, tuir estatistika ba Covid-19 iha Indonezia ne’ebé www.tempotimor.com asesu, to’o iha 25 Maiu 2020, total kazu konfirmadu Covid-19 iha Indonezia sa’e ba 22,271 no iha kazu foun 526. Husi númeru ne’e ema ne’ebé rekuperadu na’in 5,402 no na’in 1,372 mak mate.
Ba númeru kazu Covid-19 iha Nusa Tenggara Timur (NTT) ne’ebé sai nu’udar provinsia ne’ebé iha fronteira direitamente ho Timor-Leste hamutuk kazu 79, rekuperadu na’in 6 no mate ida.
VIDEO PUBLISIDADE APELU HUSI PM TAUR APLAUS BA FRONT LINE