Brigadeiru João Miranda "Aluc" kongratula ba ekipa front line inklui povu Timor Leste ne'ebé esforu hodi funu kontra inimigu invizivel Covid-19.
"Parabens ba ema hotu ne'ebé serviau iha liña oin, iha luta kontra covid-19, parabens ba sira ne'ebé rekuperadu, no parabens ba povu Timor laran tomak," dehan segundu komandante operasionál SIJK Brigadeiru Jerál João Miranda "Aluc" iha sala situasaun ba jornalista sira, Kuarta (20/05)
Brigadeiru Aluc afirma, husi marsu to'o abril TL rejista kazu konfirmadu 24.
VIDEO PUBLISIDADE APELU HUSI PM TAUR APLAUS BA FRONT LINE
"Hanesan públiku akompaña katak sira husi loron 21 marsu 2020 ne'ebé detekta katak ita iha kazu konfirmadu ida ba surtu Covid-19 ne'ebé sa'e to'o kazu konfirmadu 24 no provavél 4 iha loron 24 abril 2020," dehan Aluc
Maske iha kazu konfirmadu ba corona virus hamutuk na'in 24, maibé liuhusi serviau hamutuk ohin TL livre husi infeksaun corona virus.
"SIJK iha koordenasaun servisu di'ak ho Ministériu Saúde (MS) no ekipa inter-ministeriál sira, liu-liu apoiu ho ita nia profesionais saúde sira, no kooperasaun di'ak teb-tebes povu doben Timor Leste, mak ita konsege kontein no deklara zero ba kazu pozitivu no la rejista ba ema mate iha ita nia rai," dehan segundu komandante operasionál SIJK ne'e.
Nia dehan, esforsu sira ne'ebé ekipa sira halo, marka mós istoria ida iha TL.
"Esforsu no susesu ne'e rejista iha ita nia nasaun nia istória, katak reziste para manan no ohin ita deklara ho susesu katak ita hakat liu ona faze dahuluk iha luta kontra COVID-19 iha Timor-Leste ho susesu," nia dehan
Nia afirma, maske péritu sira nia análiza no informasaun ne’ebé Organizasaun Mundial da Saude (OMS) fó sai, katak surtu ida ne’e seidauk lakon iha mundu no Timor Leste tenke organiza an, preparadu liután atu hosoru iha ondas daruak hanesan paiz sira seluk halo.
Bazeia ba liberdade ne'ebé TL liu ona iha faze dahuluk, maka SIJK avalia hela dadaun servisu sira ne’ebé presta ona durante besik fulan rua laran, no sei submete ba komandu operasionál no inter-ministeriál hodi tetu no deside pasu sira tuir mai hafoin estadu emerjénsia.
Segundu Komandante operasionál SIJK nian husu nafatin ba povo Timor Leste tomak atu kontinua akompaña no apoiu esforsu hotu-hotu ne’ebé ita nia estadu sei hola iha tempu sira tuir mai iha kombate ba Covid-19. Tanba esforsu hirak ne’e so posível wainhira ita hamutuk, no hamutuk ho disiplina. So nune’e de'it mak ita bele rejista dala ida tan vitória foun iha luta kontra COVID-19.