Tempotimor (Dili) - Atualizasaun Coronavirus Disease 2019 (Covid-19) iha Timor-Leste, suspeitu iha Munisípiu Dili zero ona, maibé iha munísipiu sira seluk sa'e ba 56.

Portavós Sentru Integradu Jestaun Krize (SIJK), Odete da Silva Viegas hateten,  suspeitu ba Covid-19 iha Dili zero, maibé iha munisípiu sa'e ba 56.

"Husi Munisípiu Covalima na'in 6, Munisípiu Ermera na'in 6 no Lautem 42," dehan nia, iha Sentru Konvensaun Dili (CCD), Sesta (8/5).

VIDEO PUBLISIDADE APELU HUSI PM TAUR APLAUS BA FRONT LINE

Entretantu, sidadaun sira ne'ebé sei iha vizilánsia sentinela hamutuk 130.

"Sidadaun sira ne'ebé sei iha vizilánsia sentinela hamutuk 130, husi Munisípiu Bobonaru hamutuk 13, Munisípiu Covalima 13, Ermera 10, Lautem 18, Likisá 56 no Manatutu na'in 20," dehan portavós SIJK.

Entretantu, totál amostra sei iha na'in 186, sira ne'ebé rezultadu teste negativu iha munisípiu na'in 46.

PUBLISIDADE

Alende ne'e, suspeitu no sidadaun sira ne'ebé iha vizilánsia sentinela iha Ospital Nasionál Giudo Valadares (HNGV) no Ospitál Referál sira laiha, maibé iha Herox Baukau mak na'in 24, Ospitál Referál Maliana 13, Ospitál Referál Suai 17, Ospitál Referál Oekusse no Maubisse mak laiha. Nunee, amostra sei iha 54, rezultadu negativu zero.

Entretantu, atualizasaun dadus ba loron ohin nian teste laboratóriu komulativu hamutuk 830. Husi númeru ne'e na'in 114 mak sei hein rezultadu, pozitivu mantein 24, kazu konfirmadu foun laiha, rezultadu laboratóriu negativu hamutuk 692, kazu rekuperadu na'in 21, na'in 7 kontinua iha izolamentu, entretantu pesoál saúde ne'ebé sei iha kuarentena hamutuk 44, ema ne'ebé sei iha kuarentena hamutuk 167, entretantu sidadaun sira ne'ebé liu ona kuarentena ka loron 14  hamutuk 2. 080. (*)

PUBLISIDADE

PUBLISIDADE