Tempotimor (Dili)-Relasiona ho kazu konfirmadu ne'ebé sa'e maka'as to'o na'in 24 iha fulan abril, maibé tama ba estensaun estadu emerjénsia iha faze daruak nian, iha fulan maiu ne'e, kazu konfirmadu hahú reduz maka'as tebes, husi númeru 24, dadaun ne'e hela de'it na'in ualu.

 

Tuir porta-voz Sentru Integradu ba Jestaun Krize (SIJK) doutora Odete da Silva Viegas katak kazu foun husi Covid-19 mantein zero.

 

"Kazu konfirmadu mantein 24, maibé kazu foun mantein zero," dehan Porta-voz SIJK Dra. Odete iha sala situasaun ba jornalista sira, Segunda  (04/05).

 

 

 

Entretantu sidadaun sira ne'ebé hala'o ona teste hamutuk 607. Husi sira ne'ebé teste ona, na'in 103 sei hein rezultadu, sira ne'ebé rezultadu negativu hamutuk na'in 579, sira ne'ebé konfirmadu pozitivu Covid-19 hamutuk 24, husi na'in 24 ne'e, na'in 16 mak rekopera ona, kompostu husi pozitivu na'in 12 no provavél na'in 4. Entretantu na'in 8 mak sei konfirmadu no dadaun ne'e sei iha hela fatin izolamentu Sentru Saúde Vera Cruz. Nune'e mós sidadaun sira ne'ebé sei iha kuarentena obrigatóriu hamutuk 273, pesoál saúde iha kuarentena hamutuk na'in 40 no sira ne'ebé liu ona períodu inkubasaun hamutuk 1941.

 

Husi observasaun tempotimor.com nian nota katak husi loron 25 abril to'o 04 maiu 2020, kazu konfirmadu mantein 24 no laiha kazu foun, maske iha kazu suspeitu nia númeru ne'ebé kada loron aumenta, maibé husi kazu konfirmadu na'in 20 ne'e, na'in 16 konfirmadu pozitivu no na'in 4 seluk provavél mak rekopera ona, husi corona virus refere, tanba pasiente sira nia imunidade forte.