Pasiente rekuperadu ida, Feliciano Amado de Carvalho, hamutuk ho nia kolega na'in sia (9) seluk, ohin, Sesta (01/05), sai ona husi fatin izolamentu Vera Kruz.

Feliciano nu'udar estudante Timor-oan ida ne'ebé hala'o estudu iha Indonezia. Hafoin Covid-19 'invade' Indonezia, estudante ne'e deside hodi fila mai Timor-Leste. Nia hala'o viajen husi Kediri ba Surabaya, hafoin semo ba Kupang no hala'o viajen mai Atambua iha 31 Marsu 2020, no iha 1 Abril, nia ho nia maluk sira seluk tama mai Timor-Leste no evakua kedan ba kuarentena iha Hotel Katuas.

Hafoin konfirmadu livre ona husi Covid-19 no bele sai ona husi fatin izolamentu, Feliciano ho nia kolega sira sente haksolok no agradese ba pesoál saúde sira ne'ebé durante ne'e akompaña ona sira.

VIDEO PUBLISIDADE APELU HUSI PM TAUR APLAUS BA FRONT LINE

"Ami la haluha hato'o ami-nia obrigadu-wa'in ba doutór no doutora sira ne'ebé durante ne'e akompaña ona ami husi kuarentena to'o mai izolamentu no to'o ohin ami livre husi virus ida ne'e," dehan Feliciano iha Sentru Saúde Vera Kruz, Sesta (01/05).

Feliciano husu ba sosiedade sira atu mantein regra sira ne'ebé governu fó sai ona hanesan fase liman ho sabaun, mantein distansia sosiál, inklui uza maskara bainhira sai ba fatin públiku.

Iha fatin hanesan, portavoz Sentru Integradu ba Jestaun Krize (SIJK) Sergio Lobo hatete, sidadaun na'in 10 ne'ebé rekuperadu husi Covid-19 livre husi izolamentu.

"Ohin ita liberta tan ita-nia maluk na'in 10 iha sala izolamentu," dehan Sergio Lobo.

Lori SIJK nia naran, Sergio Lobo agradese ba Timor-oan sira ne'ebé rekuperadu tanba koopera no tuir regulamentu hirak ne'ebé iha.

"Lori SIJK hakarak agradese ba maluk sira ne'ebé rekopera ona, tanba sira dispostu atu hela iha ne'e, iha sala izolamentu, par bele evita infesaun no propagasaun Covid-19," nia dehan.

Entretantu, Timor-oan na'in 10 ne'ebé livre ona husi izolamentu kompostu husi feto na'in lima no mane na'in lima.

PUBLISIDADE