Prezidente Autoridade Munisípiu Likisá ne'ebe mos hanesan Xefe ekipa Task Forse ba kombate Covid 19, Domingos dos Santos da Conceição 'Mau Caro' hateten, sidadaun balun maski moras lakohi ona atu ba konsulta tanba ta'uk tama kuarentena relasiona Covid-19.

"Ita-nia sidadaun kuandu sira ulun moras, sira lakohi ba ona ospitál. Sira dehan, ita ba mak dehan Corona hela deit, di'ak liu ita hela iha de'it" dehan nia.

Maski nune'e, Prezidente Autoridade Munisípiu Likisá nu'udar mós Prezidente Ekipa Forsa Tarefa, orienta atu servisu saúde Likisá halo vijilánsia totál ba kondisaun saúde populasaun sira nian.

VIDEO PUBLISIDADE APELU HUSI PM TAUR APLAUS BA FRONT LINE

"Ha'u sempre fó hanoin ba servisu saúde Munisípiu Likisá katak kada loron rua tenke update informasaun kona-ba progresu servisu ne'ebé ita hasoru iha terenu", tenik nia.

Autoridade Munisípiu Likisá rasik seidauk simu orientasaun ruma husi Sentru Integradu Jestaun Krize (SIJK), maibé servisu ne'ebé halo iha Likisá inisiativa husi Prezidente Autoridade rasik.

"Orientasaun husi ha'u mak ne'e, kualker sidadaun ne'ebé deteta iha indisiu ruma hanesan ne'e, ita tenke halo diagnostika para bele haree", dehan nia.

Nune'e, sidadaun balun ne'ebé mai husi estranjéiru sira ba kuarentena obrigatoriu no agora sira fila ona mai Likisá, balun maka sei kontinua iha kuarentena obrigatóriu.

Ba sira fila mai mós sei halo auto kuarentena iha sira-nia ida-idak nia uma.

"Ami sempre orienta pesoál saúde sira para halo aproximasaun beibeik, tanba sira iha auto kuarentena mas iha fali buat ruma koko halo teste fali", tenik nia. (*)