Diretora Odete dehan, kazu pozitivu Covid-19 ne'ebé iha semana hirak liu ba deteta bazeia ba teste ne'ebé halo iha Timor-Leste, hafoin haruka fali ba Australia hodi konfirma.
"Kona-ba teste ran nian ita bele hala'o tanba ita iha ona mákina rasik, hanesan foin lalais kazu ida pozitivu no negativu ne'e ita hala'o (teste) iha ne'e, ne'ebé 100% hatudu pozitivu no negativu, depois ita haruka ba konfirma iha Australia mós fila mai hanesan," dehan Odete iha Sentru Konvensaun Dili, Domingu (29/03/2020).
Diretora dehan, TL bele orgullu tanba iha ona laboratoriu ne'ebé bele halo teste ba Covid-19.
"Espesialista mikrobiolójia sira husi Australia, sira apoiu hela ita-nia tékniku laboratóriu sira no ita Timor-oan sira ne'ebé eskola iha duni laboratóriu hanesan señor Ismael no señor Ilidio, sira fila mai par apoiu laboratóriu," dehan Odete.
Ba oin, nia hatete, laboratoriu iha TL nafatin halo teste no sei kontinua halo konfirmasaun ba Australia.
"Só halo konfirmasaun mak bele haruka ba Australia maibé teste iha Timor de'it," nia dehan.