Amostra ne'e haruka ba Australia hodi halo konfirmasaun ba teste rezultadu sei negativa hela.

"Sira hotu hotu LIVRE husi moras ida ne’e", deklara Vise Ministra Saúde, Elia dos Reis Amaral, iha Palásiu Sinzas, Tersa (24/3). 

Ekipa Médika ne’ebé akompanha no monitoriza pasiente na'in 5 deside ona atu fó alta sira husi kuarentena tanba sira-nia kondisaun di'ak no rekupera ona husi sintoma. 

Entretantu, Timor-Leste ne’ebé iha ona kazu ida ne’ebé konfirmadu ida. Pasiente ne’e kontinua halo tratamentu médiku no nia kondisaun to’o agora kontinua estável. 

Maski nune'e, iha buat balun ne'ebé Vise Ministra Elia 'subar' hela. 

Durante konferénsia imprensa la fó biban ba jornalista sira atu husu pergunta lubuk ida ne'ebé sai preokupasaun públiku nian. 

Laiha informasaun klaru ema ne'ebé afetadu ne'e estranjeiru ka timoroan? Oinsá mak pasiente ne'e bele afetadu? No laiha informasaun kona-ba pasiente ne'e ninia istória viajen. 

Karik pasiente ne'e halo ona kontaktu ho ema balun oinsá kontrolu Ministeriu Saúde nian?

Pasiente ne'e agora halo tratamentu iha ne'ebé? No oinsá ho tratamentu ba pasiente ne'e?

Maski nune'e, informasaun hirak ne'e sai nakukun de'it tanba laiha esplikasaun husi Ministériu Saúde ne'ebé lider ekipa Task Force. Nune'e, ema parte terseiru aproveita hodi espalla informasaun hoax (falsu) hodi halo públiku sai pániku liután. (*)