Tuir komunikadu imprensa ne'ebé tempotimor.com asesu katak, Austrália kontinua serbisu hamutuk ho TL ba iha preparasaun hodi responde ba situasaun COVID-19 nian.
"Austrália fornese ona ekipamentu protesaun pesoál (EPP) no material médiku hodi proteje pesoál saúde sira, no daudaun ne’e buka atu hetan ekipamentu médiku esensiál sira," deklara komunikadu husi embaixada Australia iha TL ne'ebé tempotimor.com asesu, Tersa (24/03).
Komunikadu ne'e hatete, governu Australia hamutuk ho instituisaun edukasaun Menzies School of Health Research, Austrália, daudaun ne’e serbisu hodi apoia TL ninia laboratóriu nasionál hodi hala’o teste ba Covid-19 iha rai-laran iha tempu badak mai, no fornese pesoál saúde treinadu sira iha ospitál nasionál.
Australia mós sei hasa’e apoiu finanseiru ba organizasaun Maluk Timor hodi hadi’ak pesoál saúde Timor-oan sira iha klínika saúde sira iha rai-laran liu husi Maluk Timor ninia programa ida mak hanaran ASTEROID hodi prevene no kontrola infesaun hanesan ba kazu Covid-19, no fornese ekipamentu adisional ba Ministériu Saúde ninia fasilidade mak foin dadauk ne’e nakfilak sai nu’udar fatin ba izolamentu nian ne’ebé TL ona tuir TL nia planu hodi responde ba Covid-19.
"Ami sei kontinua atu serbisu hamutuk ho Ministériu Saúde no Organizasaun Mundiál ba Saúde hodi hasoru dezafiu ba Covid-19 iha Timor-Leste," governu Australia promete.