Print this page

MS Hetan Apoiu Husi Ajensia Internasionál Realzia Workshop Nasionál MPDSR

Ministra Saúde, Odete Maria Freitas Belo hamutuk ho ajensia internasional sira iha Workshop Nasionál MPDSR. Ministra Saúde, Odete Maria Freitas Belo hamutuk ho ajensia internasional sira iha Workshop Nasionál MPDSR. Foto Suplay

Tempotimor (Dili)-Governu Timor-Leste iha kompromisu atu reduz taxa mortalidade Inan no Oan hanesan reflete iha Planu Nasionál Dezenvolvimentu no Planu Estratejia Nasional Setor Saúde 2011-2030, tanba ne'e iha tinan 2015, Ministeriu Saúde (MS) estabelese Sistema Vijilánsia no Resposta Mortalidade Inan (MDSR) iha Munisípiu 12 inklui RAEOA, ne'ebe hetan apoiu husi ajensia internasional sira hodi realiza Workshop Nasionál MPDSR.

Tuir informasaun ne’ebé www.tempotimor.com asesu iha pájina Pálasiu Sinzas, sesta (12/05) katak, depoiz de integra vijilánsia mortalidade perinatal ba sistema refere, ohin marka tan pasu siknifikativu ida hodi liuhusi Ministra Saúde, Odete Maria Freitas Belo iha Salaun Delta Nova hala’o lansamentu ba Matadalan Nasionál Vijilansia no Resposta Mortalidade Materna no Perinatal (MPDSR) nomos estabelese Komisaun Nasionál MPDSR no kongratula komisaun MPDSR iha nível ospitál sira inklui munisípiu ne’ebé estabelese ona durante reorientasaun sistema MPDSR iha teritoriu Timor-Leste nian.

Ministra Odete Belo hatete, haree ba númeru mortalidade bebé nian ne'ebé laiha mudansa siknifikativu no kuaze 40% husi mortalidade labarik tinan lima mai kraik koñtribui husi mortalidade bebé no maioria mortalidade sira ne'e bele prevene.

Tanba ne’e, iha tinan 2019 inkopora tan Perinatal ba Sistema (MPDSR) ho objetivu atu revee no halo autopsia verbál ba mortalidade Inan no Bebé foin moris ne'ebé akontese iha fasilidade saúde nomos iha komunidade hodi identifika kazu, kolekta informasaun no analiza dadus no bele propoin solusaun no rekomendasaun hodi hadia kualidade servisu Saúde Inan no Oan.

Timor-Leste mós implementa ona pasu importante iha intervensaun atu reduz mortalidade Materna no Perinatal, liliu mortalidade hirak ne’ebé bele prevene. Progresu siknifikativu balun ne’ebé atinje ona inklui desenvolve matadalan nasional, protokolo nomós gia prosedimentu atu bele fornese atendimentu saúde liliu saúde ida ne’ebé ho kualidade no kobre populasaun hotu.

“Hau husu ba ita hotu atu bele familiariza no kompriende didiak dokumentu sira ne’e atubele fasilita implementasaun programa sira seitór saúde nian ho kualidade no tuir padraun ne’ebé iha. Sistema vijilánsia no Resposta Mortalidade Materna no perinatal bele hatudu dalan ba instituisaun saúde sira iha Timor-Leste, hodi bele rezolve problema mortalidade Inan no natimortos (stillbirhs) no Bebé (neonatais). Maske Sistema refere hahú ona maibé persiza tebes atu mellora tan, liliu iha parte resposta nian”, dehan Ministra Saúde.

Nune’e iha nível nasionél, presiza tebes Komisaun MPDSR (Maternal Perinatal Death Surveillance and Response) ninia komprimisu no esforsu hodi revee kazu mortalidade materna no perinatal ne’ebé relata husi Munisípiu sira.

Komisaun MPDSR nível nasionál presiza fó suporta másimu hodi fornese feedback, asaun implementasaun no resposta imidiatu ba komisaun MPDSR iha nível munisípiu.

“Iha momentu ida-ne’e, hakarak mós hato’o apresiasaun bo’ot ba apoiu tékniku no finansiamentu hosi ajénsia tolu ho lideransa Sr. Bilal-UNICEF, Sra. Pressia-UNFPA, no Dr. Arvind Mathur-OMS ne’ebe sempre apoiu iha prosesu dezenvolvimentu guia nasionál ida ne’ebé kompriensivu nomos apoiu ba atividade tekniku seluk-seluk tan”, ministra deklara.

Ministra Odete mós agradese ba parseiru sira seluk-seluk hanesan PHD, ONG Hamnasa, Frontline, MSTL, SHARE, CCT, no seluk-seluk tan ne’ebé labele temi idak-idak, ne’ebé kontribui makaás hodi fó suporta mai Ministeriu Saúde liliu ba Departamentu Saúde Materno Infantil hodi kontribui ba redusaun morbilidade no mortalidade Inan no Oan. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items