Tuir observasaun www.tempotimor.com iha terenu katak, Atuál Prezidente Partidu Fretilin, Lú Olo hala'o duni ona nia viajen ba Malazia ho aviaun marka Batik Malázia, iha ne'ebé Prezidente PN, Aniceto Longuinhos Guterres Lopes no Ministru Planeamentu no Ordenamentu (MPO), José Reis inklui entidade sira seluk mós hamrik no konsentra iha Aerportu Internasional Komoro hodi akompaña Lú Olo nia viajen ba Malázia.
Antes ne'e, Francisco Guterres Lú Olo afeta moras ho kondisaun saúde fraku oituan, nune'e baixa iha Hospitál Nasionál Guidu Valadares (HNGV) iha loron 12 fulan setembru.
Hafoin baixa tiha iha HNGV, Lú Olo hetan tratamentu médiku ne'ebé di’ak tebes husi komponenti hotu ne’ebé hola papel importante iha area oioin hodi kontribui ninia rekuperasaun, nune'e konsege alta hikas iha loron-17 fulan-setembru.
Durante hala'o tratamentu iha HNGV, Lú Olo hetan vizita husi Prezidente Repúblika, José Ramos Horta, Primeiru Ministru, Taur Matan Ruak, Prezidente Parlamentu Nasional, Aniceto Guterres, Sekretáriu Jerál Fretilin, Mari Alkatiri inklui entidade oioin. (*)