Atuál Prezidente Partidu FRETILIN, Lú Olo baixa iha HNGV hahú iha loron 12 fulan-Setembru hodi hetan tratamentu médiku ba nia kondisaun saúde ne'ebe fraku oituan.

Tuir informasaun ne'ebe fó sai husi Pajina Ofisial Ex-Prezidente Repúblika no atual Prezidente partidu FRETILIN, Francisco Guterres Lú Olo katak, ohin, loron-17 fulan-setembru Lú Olo alta ona husi Hospital Nasional Guido Valadares (HNGV), hafoin hala’o tratamentu médiku durante loron lima.

Durante iha HNG, Lú Olo hetan tratamentu médiku di’ak tebes husi komponenti hotu ne’ebé hola papel importante iha area oioin  hodi kontribui ba  rekoperasaun Lú Olo nian ne’ebe ho lais tebes.

Ba rekuperasaun ida-ne'e, Lu Olo ho nia família agradese tebes ba esforsu sira, atendementu di’ak no apoiu tomak husi ekipa médiku espesialista, infermeiras, ekipa laboratorista, ekipa Radiologia, ekipa  emergensia ne’ebe la sura kolen fo ona asisténsia médiku ida kualidade hodi kontribui Lú Olo nia rekuperasun ida ne'ebé lalais liu.

Durante Baixa iha HNGV, hetan vizita husi Prezidente Republika, José Ramos Horta, Primeiru Ministru, Taur Matan Ruak, Prezidente Parlamentu Nasional, Aniceto Longuinhos Guterres Lopes,  Chefe Estadu Maior F-FDTL, Tenenti General Falur Rate Laek, inklui  família boot husi Partidu FRETILIN, liuliu ba  Sekretario Jeral FRETILIN,  Mari Alkatiri ne’ebe hala'o vizita kuaze lorloron.

Aleinde ne’e, hetan mos vizita husi Veteranu família husi Ossu-Viqueque no Atauro no sira seluk ne’ebe la temi naran ida-ida.

Tanba ne'e, agradese entidade tomak nia laran luak hola momentu balun hodi ba vizita Lú Olo no akompaña ho orasaun sira mak fo mos forsa no korajen ba Lú Olo hodi rekopera husi nia moras.

Ba solidareidade hirak ne’e, eis Prezidente Repúblika, Lú Olo hamutuk ho nia família tomak dala ida tán hato’o agradese bo'ot tebes. (*)