Tuir dadus husi Asosiasaun Defisiente Timor Leste (ADTL) kuaze ema na’in rihun 30 mak enfrenta problema mental no seidauk hetan atensaun husi parte kompetente sira.
"Ami-nia rekomendasaun ba governu atu tau ona fatin propriu ba ema ho moras mental sira par hamenus risku ba sira, tanba realidade moras mental sira la'o hela iha dalan ninin, laiha familia ida atu buka tuir, entaun tenke kria duni fatin ba sira," deklara Diretór Ezekutivu ADTL Cesario da Silva hafoin hasoru-malu ho Primeiru Ministru Taur Matan Ruak iha palasiu governu, Tersa (05/11/19).
Cesario dehan, ADTL preokupa ho kondisaun ida ne’e maibé ADTL laiha fatin ne’ebé sufisiente atu bele akumula ema ho defisiensia mental ka moras mental.
Tan ne’e, nia afirma, governu presiza prepara fatin ba sira, tanba iha kazu balun feto balun ne’ebé sofre moras mental hetan violasaun sexual husi ema normal balun.
"Ami hakarak uma mahon ba ema ho moras mental governu mak kria hodi halo kooperasaun serbisu ho organizasaun defisiente sira,” dehan nia.
Tuir dadus ne'ebe iha numeru ema moras mental husi tempo ba tempo aumenta beibeik iha liuron ninin kapital Timor Leste.