“Estadus Unidus kontente atu oferese tan apoiu ba COVID-19 hodi kombate pandemia ne'e no hametin seguransa saúde”, dehan Enkaregadu Negósiu Embaixada EUA, Tom Daley liuhusi Komunikadu Imprensa ne'ebé www.tempotimor.com, asesu husi Gabinete JICA, sesta (19/08).
Fundu ne'e rasik sei aloka mós ba kontinuasaun servisu esensiál saúde ba inan no kosok-oan sira-nian inklui saúde husi labarik sira-nian iha teritóriu laran tomak atu nune'e kontinua reforsa seguransa saúde iha Timor-Leste.
Nune'e mós aumenta tan apoiu ba kampaña vasinasaun COVID-19 nian ba populasaun sira ne'ebé elijível, no hadi 'a prevensaun ho kontrolu ba infesaun iha sentru saúde komunitária sira, no nafatin promove prevensaun COVID-19 iha rai laran.
Maibé orsamentu ida-ne'e mós sei permite aloka mós ba Munisípiu rua liuhusi Ministériu Saúde no ida-ne'e nu’udar kontinuasaun ida husi apoiu ne'ebé fó ona ba Munisípiu Ermera, Bobonaro, Likisá, no Ainaro.
“Orsamentu ida-ne’e, nu’udar aumentu ida ba fundu millaun $1 ne'ebé entrega no anunsia ona iha fulan-setembru 2021 ba atividade hanesan”, hatete nia.
Husi apoiu hirak ne'e, mak parte Embaixada EUA iha Timor-Leste mós hato'o parabéns ba progresu ne'ebé Timor-Leste hetan ona kona-ba kombate hasoru pandemia.
“Apoiu ohin loron nian bazeia ba progresu ne’e, atu haluan tan kobertura vasinasaun ba área balun ne'ebé remota liu iha nasaun ne'e, liuhusi kampaña sensibilizasaun espesífika ba sira ne'ebé seidauk bele simu vasina COVID-19 nian”, haktuir nia.
Ministra Saúde, Odete Freitas Belo hatete, Ministériu Saude apresia apoiu husi USAID nia ne’e tanba sei reforsa servisu pesoál saúde sira iha munisípiu hotu inklui RAEOA hodi responde ba pandemia COVID-19 no hasa'e partisipasaun komunidade sira-nian iha kampaña vasinasaun COVID-19.
“Dezde pandemia ne 'e hahú, Estadus Unidus Amérika serbisu hamutuk ho Governu Timor-Leste hodi fornese liu millaun $7.4 iha asisténsia krítiku atu kombate COVID-19 inklui vasina Pfizer liu 200, 000”, afirma nia.
Dadauk Estadus Unidu Amerika mós hala'o hela abordajen no abranjente ida hodi hapara pandemia ne'e iha mundu tomak, hodi hamenus impaktu husi COVID-19 ba ema no sosiedade no hametin rekuperasaun globál. (*)