“Totálmente ita-nia doze vasina sarampu nian, kobertura tuun to'o pursentu 80 iha 2021, ida ne'e kobertura ki'ik liu desde 2008, iha 2021 ita-nia kobertura ba sarampu tuun pursentu 24 husi labarik la hetan sira-nia vasina sarampu rutiña, to'o 2022 mós kobertura tuun nafatin”, informa Reprezentante OMS iha Timor-Leste (TL), Arvind Mathur, iha Sentru Konvensaun Baukau (CCB) Vila Antiga, bainhira partisipa iha enseramentu sorumutu nasionál, kona-ba integra vasinasaun COVID-19 ba programa imunizasaun rutiña no preparasaun ba kampaña vasinasaun Sarampu, Rubela, PCV, Vit A no Albendazole, kinta (11/08).
Tanba Ministéru Saúde (MS) durante ne’e esforsu luta hasoru pandemia COVID-19 iha Timor-Leste hodi fó impaktu negativu ba programa saúde seluk.
Iha pandemia COVID-19 Ministériu Saúde adminstra ona vasina kontra COVID-19 nian ba populasaun hamutuk 1,7 millões, maibé prezisa kobre tán vasina doze pur-volta 800 ba populasaun idade-18 ba leten inklui administra tán vasina rutiña pur-volta 36.00 doze ba labarik sira.
Nune'e OMS kontinua iha komitmentu atu hamutuk ho MS dezenvolve setór saúde liuhusi kampaña ne'ebé sei realiza iha fulan-outubru tinan-2022 hodi haree ba asuntu prinsipál sira hanesan vasina rutiña nian.
“Bazeia ba nesesidade ida ne'e, administra COVID-19 nian no fó mós vasina rutiña ba labarik sira konsidera prudentru tebes hodi integrasaun vasina COVID-19 ho vasina rutiña nian bele hetan rezultadu efetivu ba tinan oin mai, iha mós vasina foun hanesan vasina PCV iha fulan hirak mai”, afirma nia.
Reprezenta UNICEF iha Timor-Leste, Ainho Jaureguibetia hatete, sei hamutuk ho MS hodi halo kampaña kona-ba vasina rutiña nian atu hasa'e imunizasaun labarik nian no intruduz vasina foun inklui distribui ai-moruk anti lombringa ba labarik sira menus husi idade-5.
“Dadus hatudu servisu esensiál ba labarik sira impaktu husi COVID-19, ida-ne'e impaktu direita ba labarik rihun ba rihun ita Timor laran, tanba ne'e atu aselera imunizasaun, nutrisaun no servisu esensial sira seluk”, rekomenda nia.
Ministra Saúde, Odete Belo hatete, liuhusi aprezentasaun OMS no UNICEF atu lori populasaun liliu labarik ki'ik sira atu lalika mate tán presiza simu vasina prevene moras.
Tanba ne'e, MS prepara ona planu ba kampaña iha fulan-outubru tinan-2022, prioridade liuba kuidadu servisu primária nian iha Timor-Leste, kona-ba promosaun, prevensaun, nune'e bele reduz ema moras, liuhusi saúde na familía nu’udar atividade hakbesik ba komunidade hodi fó vasina.
“Ita hakarak prevene moras ho vasina ne'e, ita mós halo programa seluk programa integral tebes, ita fahe vitamina A, fó ai-moruk lombringa nian ba ita-nia oan sira, haree mós asuntu ma-nutrisaun nian”, hatete nia.
Iha ne’e enkoraza nafatin pesoal saúde sira hotu husi área promosaun atu hakbesik komunidade hodi fó hanoin ba kada programa relasiona ho saúde nian nune'e bele atrai komunidade hakbesik-an liután ba sentru saúde sira.
“Covid-19 ita hotu aprende iha ne'eba, maske ema ko'alia maibé vasina la'o nafatin ho atinjimentu ne'ebé mak boot ne'e la'ós servisu halimar”, argumenta nia.
Enkuantu sorumutu nasionál realiza durante loron 3 hahú iha loron 09 to'o 11 fulan-agustu tinan-2022 partisipa husi Diretór Jerál, nasionál, Munisípal, Xefe Sentru saúde, inklui responsabilidade saúde na familía, promosaun saúde, inklui imunizasaun nian hamutuk na'in-624 iha teritóriu nasionál. (*)
