“Di'ak, hanesan ohin ha'u introduz hela ba kompaña produsaun Iogurt Del Belo nomós Embaixadór Kuba ba Timor-Leste no Xefe Brigada Médiku Kuba nian. Kleur tebes-tebes ona, iha kedas Doutor Sergio Lobo nia tempu ko’alia ona kona-ba Yogurt, maibé laiha ema ida mak halo segimentu ba planu ida-ne'e”, dehan Ministra Odete liuhusi pájina Pálasiu Sinza ne’ebé www.tempotimor.com asesu, sábadu (13/08).

Hafoin Primeiru Ministru mós ko’alia asuntu ida-ne'e, maske Ministériu haree, maibé  la hatene atu hahú husi ne'ebé.

“Foin lalais ami enkontru ho Eselénsia Prezidente Repúblika ne'ebé mak nia ko'alia filafali kona-ba Yogurt e aumezmu tempu Primeiru Ministru mós ko'alia nafatin kona-ba asuntu ida-ne’e”, hatete nia.

Tanba ema-boot sira ko'alia nafatin ida-ne'e, siknifīka katak iha buat ruma ne'ebé mak sira presiza duni no haree liu ba manutrisaun.

“Ko'alia kona-ba moras ne'ebé mak barak iha ita-nia ospitál, entaun ita hakarak atu haree didi'ak hahán ne'ebé mak hanesan saudável ba ita-nia ema, tanba dalaruma ita mós ladún gosta hán modo-tahan, ita hakarak hán etu mak barak liu, karbohidrat mak barak liu, ho yogurt dalaruma bele mós ajuda”, dehan nia.

Nune’e ba labarik sira iha eskola, tanba sira mós halo hela merenda eskolár, sira mós iha osan oituan ba merenda eskolár, bainhira ida-ne'e bele mós ajuda sira nomos ospitál sira.

“Ida-ne'e ha'u iha planu atu bá vizita Nasaun Kuba, atu ba vizita mós sira-nia fábrika iha ne'eba, ha'u hatene katak buat ne'e simples maibé ninia mákina sira ne'e ita presiza atu sosa. Entaun ha'u hakarak atu haree, depois de ha'u hatene katak dehan iha ita-nia rain iha ema Timoroan ne'ebé mak produz, hatene halo yogurt kleur tiha ona desde tinan 2016, entaun ida-ne'e iha oportunidade di'ak atu servisu hamutuk ho sira”, afirma nia.

Timor-Leste laiha esperiénsia, servisu halo three part, bele hamutuk ho Governu Kuba, hamutuk ho rai laran ne'ebé mak hahú ona, hamutuk ho Ministériu Saúde.

“Ha’u espera katak ajénsia sira automatikamente bainhira ita iha hanoin ne'ebe di'ak, liliu ba assıuntu nutrisaun nian ha'u hatene katak sira sei apoiu liliu hanesan WFP no UNICEF”, haktenik nia.

Enkuantu ekipamentu no matéria prima ba produsaun Iogurte ne'e Responsavel Kompañia Del Belo hatete sasán balu foti de'it iha rai-laran ka lokál, nune'e mós sasán sira seluk importa husi rai li'ur hanesan mákina produsaun inklui susubeen ne'ebé importa husi Nova Zelándia. (*)