Print this page

KM Aseita Aprezentasaun Husi MAE-MEJD ba Programa Merenda Eskólar

Estudante sira konsumu hela merenda eskola. Estudante sira konsumu hela merenda eskola. Foto Suplay

Tempotimor (Dili)-Governu liuhusi Konsellu Ministru (KM) aprova projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, no Ministru Edukasaun, Juventude no Desportu, Armindo Maia, hodi aprova Programa Merenda Eskolár.

Programa Merenda Eskolár nu’udar subsídiu ida ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loroloron ho hahán ne’ebé saudavel, ekilibrada no indispensavel ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár, hodi integra ba rede públika ne’ebé situa iha rai-laran, hodi promove ninia prosesu ensinu no aprendizajen.

“Iha programa ne’e nia okos sei fornese hahán ba alunu sira estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku nian, ne’ebé situa iha rai-laran”, dehan Ministru Prezidénsia Konsellu Ministru, Fidelis Leite Magalhães iha Palásiu Governu, kuarta (27/07).

Ba subsídiu sira ne’ebé fó iha programa ida-ne’e mak iha natureza subvensaun públika sira no asume ho forma subsídiu alimentár, ne’ebé hato’o espesiál ba sosa hahán ka subsídiu administrativu, ne’ebé ho objetivu atu suporta despeza sira ho enkargu administrativu sira impaktu husi ezekusaun programa ne’e.

Nune’e implementadór sira Programa Merenda Eskolár mak estabelesimentu edukasaun pré-eskolár nian no ensinu báziku, públiku no partikulár ne’ebé integra iha rede públika oferta servisu públiku nian, ne’ebé nia fatin iha territóriu nasionál no organizasaun komunitária sira, grupu komunitária sira ka hanesan, liuliu asosiasaun sein personalidade jurídika.

Entretantu montante subsídiu ne’ebé atribui iha ámbitu Programa Merenda Eskolár fiksa iha US$0,42 ba kada loron hanorin no ba kada alunu. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items