“Timoroan tenke hatoma-an hán hahán ne'ebé mai husi produtu lokál hanesan ai-farina, batar, fehuk. Labele hán demais hán etu ka fós”, dehan Horta liuhusi nia diskursu iha serimónia Jantar hamutuk ho krize ai-hán Mundiál iha Palásiu Prezidensial, Bairo Pite, segunda (25/07).

Ba hahán seluk husi importasaun ne'ebé mak Timoroan barak konsumu ida-ne'e sei la kontribui ba saúde hanesan supermie sira tanba iha kontaminasi ho kímiku.

Tanba ne’e, presiza hán de'it hahán sira ne'ebé husi produtu lokál tanba sei kontribui nutrisaun di'ak ba ema nia saúde, nomós evita provoka diabete.

Nune'e mós sidadaun sira tenke hatoma-an hemu bee-barak no hán ai-fuan maka'as atu hadi'a nutrisaun ema nian no liliu ba labarik no inan isin-rua sira, nomós muda maneira hán nian oinsá mak bele konstribui ba nutrisaun di'ak iha Timor-Leste.

“Ha'u haree katak programa Governu nian ba kombate mánutrisaun di'ak loos no Prezidente Repúblika tenke tane ida-ne'e, tanba hanesan konsidensia ka hanoin ida de'it atu kosok-oan sira hahú kedas husi inan isin-rua, iha nutrisaun di'ak hodi fó susuben inan nian ba bebe atu nia bele iha nutrisaun di'ak”, hatete nia.

Tanba dadus estastestika husi UNICEF nian katak inan isin-rua ne'ebé mak fó susuben inan nian ba oan sira, ida-ne'e foin atinje pursentu 50, no presiza hakas-an atu númeru ne'e sa'e ba pursentu 80.

Bainhira ko'alia kona-ba nutrisaun ba labarik kosokoan sira ne'e importante liu susuben inan nian tanba susuben husi inan nian, di'ak liu kooresponde 100% ba oan sira-nia saúde.

Tanba ne'e, husu atu Kampaña ba nutrisaun tenke maka'as liliu ba inan sira, tenke fó susu nafain bebe no inan tenke iha edukasaun atu iha ijene labele abandona labarik sira moris livre hodi lori moras ne'ebé afeita ba saúde públika no implika mánutrisaun iha família.

Ministra Saúde (MS), Odete Freitas Belo hatete, dadaun ne'e Ministériu Saúde iha planu prióridade ba hadi'a nutrisaun iha Timor-Leste liuhusi atividade kampaña ba nutrisaun.

Programa ne'e rasik hetan mós apoiu maka'as husi Xefe Estadu no Xefe Governu atu labarik Timoroan sira iha nutrisaun di'ak no bainhira labarik sira ne'e boot iha dezenvolvementu di'ak iha parte fiziku no intelektuál.

Maibé husu nafatin ema hothotu tenke iha obrigasaun atu kontrolla ninia hahán nune'e labele monu ba moras ne'ebé afeita ba saúde públika no lori impaktu negativu ba kondisaun nutrisaun labarik sira-nian.

Dadaun apoia ne'ebé iha kona-ba hadi’a nutrisaun ba labarik sira ne'e, Governu iha ona programa bolsa da mãe jerasaun foun no programa ida ne'e nia objetivu prinsipál mak Timor-Leste bele iha redusaun ba mánutrisaun tuir Objetivu Dezenvolvementu Sustentabilidade (ODS), ne'ebé sei atinje iha 2030. (*)