Ministru Saude Interinu Bonifácio Maucoli informa, iha tinan 2020 MS sei estabelese KSK hodi halo intervensaun ba moras fuan ne'ebé dala-barak transfere ba rai li'ur.
"Moras ne'ebé barak liu haruka ba li'ur mak moras fuan. Tanba ne'e iha tinan oin, hahú Janeiru estabelese klinika sentru kardial, atu nune'e iha 2020 no 2021 ita halo intervensaun," dehan Ministru Maucoli iha palásiu governu, Kuarta (23/10/19).
Aleinde ne'e, Ministru hatutan, kona-ba moras seluk hanesan rins la presiza ona ba rai li'ur tanba iha ona espesialista Timor-oan ne'ebé hetan mós asistensia husi espesialista husi Malazia.
"Hanesan monta rins ne'e la presiza ba rai li'ur ona, ne'ebé ita-nia espesialista ida ita haruka ba prepara ona no dadaun ne'e ita kontaktu ona ho Health medical center husi husi Malazia, hodi mai halo akompañamentu ba ita-nia espesialista sira, par to'o tinan lima ka neen hanesan ne'e ita bele halo intervensaun mesak ona, la presiza ba rai liur," nia dehan.
Kona-ba fase raan, ministru ne'e hatete, iha TL iha ona no MS planu atu harii sentru onkolójia ba moras kankru.
"Hemodialisa ka fase raan, dadaun ne'e ita funsiona hela, fase hela raan, depois ita haree oinsa mak estabelese tan sentru onkolójia, atu ba kanker sira ne'e, ita halo tratamentu iha ne'e, maibé ita presiza prepara no kapasita ita-nia espesialista sira," dehan Maucoli.