Tuir informasaun ne’ebé www.tempotimor.com asesu husi pájina Prezidente Repúblika, domingu (26/06) katak, SUPER CEREAL mak ai-hán suplementu ho valór nutrisaun vitamina no minerál di’ak, no presiza tein halo grosu molok konsumu.
Tanba Super Cereal ne’e, kompostu husi batar, fore keli, masin midar no vitamina no minerál ne’ebé iha vitamina no minerál di’ak ba inan isin-rua no oan sira saúde.
Ministra Saúde (MS), Odete Maria Freitas Belo hatete, Prezidente Repúblika iha kompromisu ida-ne'e nu'udar Ministra Saude hamutuk ho pesoál saúde sira atubele haree estratéjia ida ne'ebé mak di'ak atu reduz mánutrisaun iha Timor-Leste.
“Ami la serbísu mesak, ami serbísu ho Ajénsia Nasaun Unidas sira hasan WFP ne’e mk agora dadauk iha fatin ida-ne'e. Serbísu mós ho UNICEF, no Organizasaun Mundiál da Saúde”, informa nia.
Tanba asuntu mánutrisaun ne'e la'ós fatór ministériu saúde nian de'it maibé iha fatór barak mak kontribui númeru mánutrisaun aas iha rai laran liliu kona-ba ba kualidade ai-hán, nomós prepasaun ai-hán molok atu hán.
Ministra mós agradese tebtebes ba lider sira ne'ebé mak tau matan ba iha asuntu saúde nian espesialmente ba área nutrisaun nian.
“Prontu, ita hakarak hatete katak nutrisaun di'ak mak iha futuru mai ita sei hetan jerasaun ne'ebé mk di'ak, jerasaun Timor-Leste ne'ebé mak forte no matenek”, hatete nia.
Ba Ministériu Saúde iha estratejia rua mak uza atu deteta inan sira ho mánutrisaun no labarik sira ho mánutrisaun nune'e bele hatene númeru mánutrisaun hira mak rejista.
“Ita iha estratéjia rua, ida mak atividade ministériu saúde nian ne'ebé ideal liu mak programa saúde na família. Ministériu saúde iha programa ida hanaran saúde na família, programa ne'e profisionál saúde sira tama sai uma no komunidade atu identifika lalais inan sira ne'ebé mak ho mánutrisaun nomós, labarik sira mak ho mánutrisaun, iha mós programa foun ida iha Ministériu Solidariedade Sosiál no Inkluzaun, ne'ebé hanaran Bolsa da Mãe, ho programa bolsa da mane ne'e bele ajuda tan ministériu saúde até identifika inan ne'ebé manutrisaun. Wanhira deteta ona katak inan sira ne'ebé kategória mánutrisaun entaun ita halo kedas intervensaun”, esplika Ministra. (*)
