Emilia dehan, bainhira aimoruk iha postu saúde mamuk, autoridade munisipal mak iha obrigasaun atu hato’o pedidu ka informasaun ba ministériu saúde.
"Informasaun ne'ebé aimoruk stok out iha postu saude sira, SAMES hatete fila-fila ne'e iha akordu despaisu entre ministeriu saude ho ministeriu administrisaun estatal mak iha kompetensia par atu jere aimoruk ne'ebé stok uot iha postu saude sira," informa Diretora Interina ne’e.
Dadus Sosa Aimoruk husi MS
Entretantu, kona-ba prosesu sosa aimoruk, Emilia dehan, dadus atu sosa aimoruk mai husi Ministériu Saúde (MS).
"Planu ba aprovizionamentu dadus mai husi utilizadór sira no utilizadór mak ministeriu saude, ho baze ba utilizadór ita prepara planu depois hetan aprovasaun husi superior sira," Emilia informa.
Nia hatutan, SAMES iha rezime espesial aprovizionamentu hodi regula prosesu atu sosa aimoruk.
"Orsamentu ne'e aprova ita loke prosesu aprovizionamentu. Husi ne'e loke ba konkursu no mós pedidu kotasaun, ida ne'e mak aplika iha SAMES."
Kona-ba pedidu kotasaun, nia dehan, normalmente uza ba asuntu sira ne'ebe urjente ka stok out.
“Ne'e halai liu ba kompaña lokal, bainhira stok out ami presiza tempu ne'ebé kurtu (badak) atu hetan aimoruk hodi koresponde lalais ba nesesidade komum nian,” nia esklarese.
Hatan kona-ba aimoruk hirak ne’e sosa husi nasaun ne’ebé, Emilia hatan, daudauk ne’e aimoruk hirak ne’e sosa husi Autralia, Olanda, Portugal no India.
“Nasaun sira ne'ebé ita sosa ba ne'e depende ba konkursu ne'ebé ita loke, husi fornesedor ida ne'ebé mak manan hafoin kontrat.”