Tuir informasaun ne’ebé www.trmpotimor.com asesu iha pájina Pálasiu Sinza, domingu (19/06) katak, atividade ne’ebé hala’o hetan apoia finanseiru husi Organizasaun mundiál Saude (OMS), UNFPA, no UNICEF.
Ba atividade ne’e ho objetivu atu haforsa abilidade komisaun MPDSR (Maternal and Perinatal Death Survellance Respons) hodi suporta prosesu MPDSR sira ne’ebé forte kontribui ba fasilidade no esforsu sub-nasionál sira hodi hadi'a kualidade kuidadu saúde materno no elimina mortalidade maternál no perinatal sira ne’ebé bele prevene.
Diretór Nasionál Saúde na Família (SnF), Vitor Soares Martins esplika, suporta husi ajénsia sira importante tebes atu identifika mortalidade maternál no perinatal hirak ne’ebé bele prevene no halo asaun atubele responde ba fatór kontributivu sira.
“Atu mantein inan no labarik sira-nia saúde iha sentru kuidadu, hasa'e inan sira-nia esperiénsia pozitivu husi inan isin-rua sira no asegura katak bebé sira iha posibilidade ne’ebe di’ak liu atu hahú moris, ne’e tenke sai responsabilidade ita ida-idak nian nu’udar profesionál saúde”, dehan nia.
Ho nune’e, husu atu bele aproveita didi’ak oportunidade ida ne’e hodi fahe esperiénsia ba malu no hetan informasaun hirak ne’ebé bele kontribui fornesimentu servisu saúde inan ho oan nian ida ne’ebé kompriensivu, seguru no ho kualidade iha ida-idak nia fatin.
Orientasaun ida-ne’e hanesan kontinuasaun husi orientasaun ne’ebé hala’o ba nível ospitál ho partisipante husi komisaun MPDSR nível ospitál kompostu husi Óspital Referal 3, Rejionál 2 nomós HNGV implementa iha grupu iha fulan kotuk.
Iha semana kotuk mós, orientasaun ba nível munisípiu parte rejiaun leste nian hala'o iha munisípiu Manatuto kobre ba Munisipiu Lautein, Baukau, Vikeké, no Manatutu.
Partisipante sira kompostu husi Diretó Servisu Saude Munisípiu, Responsavel Programa SMI, Médiku no Parteira sira husi munisípiu-5 (Dili, Ermera, Likisá, RAEOA, no Aileu). Treinanentu ne'e hala'o iha Munisípiu Aileu durante loron haat husi 14-17 Juñu 2022. (*)