Print this page

MS Inaugura Sentru Amigável Saúde Adolexente no Joven iha Mulo

Vise-Ministru Saúde, Bonifácio ‘Mau Coli’ dos Reis,inaugura Sentru Amigável Saúde Adolexente no Joven iha Suku Mulo. Vise-Ministru Saúde, Bonifácio ‘Mau Coli’ dos Reis,inaugura Sentru Amigável Saúde Adolexente no Joven iha Suku Mulo. Foto SUplay

Tempotimor (Dili)-Ministériu Saúde (MS) liuhusi Vise-Ministru Saúde, Bonifácio ‘Mau Coli’ dos Reis, iha kinta (09/06), inaugura Sentru Amigável Saúde Adolexente no Joven iha Suku Mulo, Postu Administrativu Hato Builiku, Munisípiu Ainaro.

Tuir informasaun ne’ebé www.tempotimor.com asesu iha pájina MOP, sábadu (11/06) katak, estabelesimentu Sentru Amigável Saúde Adolexente no Joven, Ministériu Saúde mós servisu hamutuk ho liña ministeriál sira, autoridade munisípiu, parseiru Plan International Timor-Leste, sosiedade sivíl (FADA, TALATA, NAFOFILA) hodi estabelese ona sentru amigável ba adolexente no joven iha munisípiu tolu mak hanesan Dili, Aileu no Ainaro.

Ba servisu hamutuk ho Ministériu Edukasaun hodi enkaixa matéria saúde reprodutiva iha kurríkulu nasionál. Tanba sentru ne'e hari’i ho objetivu atu ema adolexente no joven sira bele asesu informasaun no atendementu saúde ne’ebé apropriadu no kualidade.

Vise-Ministru Saúde, Bonifácio Mau Coli dos Reis esplika, saúde adolexente no joven importante tebes iha kontextu dezenvolvimentu nasaun.

Tanba bainhira adolexente no joven sira enfrenta problema sira hanesan kaben sedu no isin-rua sedu, mánutrisaun, anemia, tuberkuloze, moras hada’et liuhusi relasaun sexuál hanesan HIV-SIDA, moras mental, no moras sira seluk sei hamosu problema sosiál, ekonomia, polítika.

“Problemas hirak-ne’e sai hanesan preokupasaun liliu Ministériu Saúde ne’ebé responsabiliza direta hodi fó prestasaun kuidadu saúde ba adolexente no joven sira, atubele prevene sira labele hetan problema”, dehan nia.

Iha oportunidade ne’e, lori Ministériu Saúde nia naran no membru husi I Governu Konstitusionál daualu, atu espressa sentidu no profundu gratidaun ba apoiu nu’udar sentidu solidariedade atu haforsa, hametin no mellora Sistema Nasional Saúde ho objetivu atu hadi’ak komunidade nia saúde no moris di’ak iha nível nasionál, munisipál, postu adminstrativu, suku no aldeia.

Liuhusi dadus Peskiza Demografíku no Saúde, tinan 2016 hatudu Adolexente entre idade 10-19 iha Timor-Leste mak 23 pursentu (%) husi totál populasaun, no jovens entre idade 15-24 hamutuk 32%.

Taxa Fertilidade ba Adolexente (Idade 15-19) mak 42/1,000 feto idade 15-19 ho diferensa entre área urbana no rurál respetivamente 19/1,000 feto idade 15-19 no 55/1,000 feto idade 15-19.

Taxa Fertilidade ba Joven idade entre idade 20-24 mak 188/1,000 feto idade 20 – 24 (urbana 132 no rurál 222). Maibé 5% husi Feto idade tinan 15 -19 maka sai ona inan, Loloos sira sei iha oportunidade atu dezenvolve-an iha aspetu vivénsia hanesan eskola, karreira no oportunidade.

Tanba haree ba taxa rua ne’e, hatudu katak adolexente no joven Feto iha área rurál iha Taxa Fertilidade aas liu kompara ho sira-ne’ebé hela iha área urbana.

Fatór sira-ne’ebé influénsia ba fertilidade aas mak hanesan Koñesimentu ba Saúde Reprodutiva, Seksuál; Asesu no oportunidade ba eskola limitadu, laiha abilidade ka skill ba área empregu ruma, nível edukasaun, kondisaun sosio-ekonómiku uma laran, konseitu tradisionalismu no kultura, influénsia husi teknolojia.

Hahú kedas iha tinan 2007, Adolexente hanesan unidade iha momentu ne’eba, servisu hamutuk ho liña ministériál ho parseiru hodi hala’o advokasia nasionál no nível munisipál hodi promove hahalok saudável liuhusi informasaun no edukasaun kona-ba saúde reprodutiva ba ema adolexente no joven sira.

Ministériu Saúde liuhusi Departamentu de Saúde dos Adolescentes e Jovens hamutuk ho parte interesadu sira hotu nafatin realiza atividade implementasaun oioin ba Adolexente no Joven sira. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items